ރާއްޖެއަށް ހެލިކޮޕްޓަރު ގެނައުމަށާއި އަދި އުތުރު ތިލަފަޅު އެއްބަސްވުމުގައި ސޮއިކުރީ ރައީސް ޔާމީންގެ ވެރިކަމުގައިކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ސޯސަލް މީޑިއާގައި ގިނަ ބަޔަކު ދަނީ ރާއްޖޭގައި އިންޑިއާ ސިފައިން އެބަތިބިކަމަށާއި އަދި އުތުރު ތިލަފަޅާއި ގުޅުވައިގެންވެސް މި ސަރުކާރު ބަދުނާމުވާ ގޮތަށް ވާހަކަދައްކަވަމުންނެވެ. ނަމަވެސް ސަރުކާރުން ވިދާޅުވެފައިވަނީ ރާއްޖޭގައި ސަމާމަތީ ކަންކަން ބެލެހެއްޓުމަށް އެއްވެސް ޤައުމެއްގެ ސިފައިނެއް ނުތިބޭނެކަމަށެވެ. އަދި ރާއްޖެއަށާއި ދިވެހިންނަށް ގެއްލުން ލިބޭނެފަދަ ރާއްޖޭގެ ކަނޑުގެ ސަރަހައްދުން އެއްވެސް ބައެއް ގެއްލޭފަދަ ކަމެއް މި ސަރުކާރުން ކޮށްފައިނުވާނެކަމުގެ ޔަޤީންކަން ސަރުކާރުން ވަނީ ދެއްވާފައެވެ.

ޖޭޕީއިން ދެވަނަ ބުރުގައި އަމަލު ކުރާނެ ގޮތެއް ނިންމުމަށް ބޭއްވި ކޮންގްރެސް އަށް ފަހު މީޑިއާތަކަށް މައުލޫމާތު ދެއްވަމުން ޤާސިމް އިބްރާހިމްވެސް ވަނީ މިއީ ކުރީގެ ސަރުކާރުން ރައީސް ޔާމީން ކޮށްފައިވާ ކަންކަން ކަމަށް ވިދާޅުވެފައެވެ. ގާސިމް ވިދާޅުވީ، ކުރީގެ ސަރުކާރުގައި ނާޒިމް ޑިފެންސް މިނިސްޓަރަކަށް ހުރިއިރު ރާއްޖޭގައި ހެލިކޮޕްޓަރު ގެންގުޅެފައިވާކަމަށެވެ.

“ރައީސް ޔާމީނުގެ ސަރުކާރުގައިވެސް ކާނަލް ނާޒިމް ޑިފެންސް މިނިސްޓަރު ކަމުގައި ހުންނަވައިގެން ހެލިކޮޕްޓަރެއް ކުރީގައި އައްޑު އަތޮޅުގައި ގެންގުޅުނު 2 ހެލިކޮޕްޓަރު. މުއްދަތު ހަމަވެގެން މުއްދަތު އެކްސްޓެންޑް ކޮށްދީފައި އަނެއްކާ އައު ހެލިކޮޕްޓަރެއް ގެނައުމަށް ނިންމާފައި އޮތް. އެ ނިންމާފައި އޮތީ ލ. އަތޮޅުގައި އޮތް އެތި. އޭގެއިތުރަށް ވާހަކަދެކެވެމުން ދިޔަ މި ރާޑަރުގެ ވާހަކައާއި ކަނޑުގެ ސަރވޭ ހެދުމުގެ ވާހަކައާއި އުތުރު ތިލަފަޅުގެ މައްސަލައާއި އެ ހުރިހައި ކަންތައްތަކެއް އެކުލެވިގެން ގޮއްސަ ވާހަކަދައްކާފައި އެމްއޯޔޫތަކުގައި ސޮއިކުރެވިފައި ހުރީ ޔާމީންގެ ސަރުކާރުގައި. މި ސަރުކާރު އައިއްސަ އޭތި ރިޕްލޭސްކުރީ. އެހެންވީމަ މި ސަރުކާރުން އެ ކަންތައްތައް ކުރެވިފަ ހުރީ ކުރީގައި ހުރި ފޯމެޓަށް ގާތްގަނޑަކަށް ހުރިހައި އެއްޗެއް ނިމިފައި ހުރީ.” ގާސިމް ވިދާޅުވިއެވެ.

މި ސަރުކާރު ބަދުނާމު ކުރުމަށް އިދިކޮޅު ފަރާތްތަކުން ދަނީ ސަރުކާރާއިމެދު ދޮގު ވާހަކަތައް ފަތުރަމުންނެވެ. ނަމަވެސް މި ކަންކަމުގެ ހަޤީގަތް ރައްޔިތުންނަށް ހާމަކޮށްދޭނެކަމަށް ސަރުކާރުން ދަނީ ބުނަމުންނެވެ.