އިދިކޮޅު ފަރާތްތަކުން ހިންގާ "އިންޑިއާ އައުޓް" ކެމްޕެއިނުގެ ބޭނުމަކީ ސަރުކާރާ މެދު ނަފްރަތު އުފެއްދުންކަމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ. ރޮޒެއިނާ ވިދާޅުވީ، ރާއްޖޭގެ މިނިވަންކަމަށް ބުރޫ އަރާނެ ކަމެއް އިންޑިއާއިން ނުކުރާނެކަން އެންމެ ރަނގަޅަށް އެނގޭނެ އެއް ބަޔަކީ ވެސް އިދިކޮޅު ކެންޑިޑޭޓް ޑރ. މުހައްމަދު މުއިއްޒުއާއެކު ތިއްބެވި ބޭފުޅުން ކަމަށެވެ. 

ގެންގުޅޭނީ އިންޑިއާ ފަސްޓް ޕޮލިސީ ކަމަށާއި އެއީ ރާއްޖެއާ އެންމެ ގާތް ގައުމު ކަމަށް މުއިއްޒު ވިދާޅުވެފައިވާ އިންޓަވިއުއެއްގެ ވީޑިއޯއާ އެކު ކުރެއްވި ޓްވީޓެއްގައި ރޮޒައިނާ ވިދާޅުވީ، އިންޑިއާ އައުޓް ކެމްޕެއިންގެ ހަމައެކަނި ނަތީޖާއަކަށް ވާނީ ދިވެހިންނާއި އިންޑިއާއާ ދޭތެރޭ އޮތް ޒަމާންވީ ރަހުމަތްތެރިކަން ނަފްރަތަށް ބަދަލުވެ އެތައް ބައެއްގެ ހިތުގައި ހަގީގަތެއް ނެތް ބިރުވެރިކަން އުފެދުން ކަމަށެވެ.

"މުއިއްޒުގެ ވެރިކަމެއް އަޔަސް އޮންނާނީ އިންޑިއާ ފަސްޓް ޕޮލިސީ. އެއްވެސް މީހަކު ބޭރެއް ވެސް ނުކުރާނެ، މިތާ ހިނގާ އޮޕަރޭޝަންސް ކުރިޔަށް ދާނެ. ހުރިހާ ގެއްލުމެއް ރައްޔިތުންނަށް،" ރޮޒެއިނާ ވިދާޅުވިއެވެ.

ކެމްޕެއިން ތެރޭ މުއިއްޒު ވަނީ ވެރިކަމުގެ ފުރަތަމަ ދުވަހު ވެސް އިންޑިއާ ސިފައިން ރާއްޖޭން ފޮނުވާލުމުގެ ވާހަކަތައް ފައްޓަވާނެ ކަމަށް ވިދާޅުވެފައެވެ. އިންތިހާބު ކާމިޔާބު ކުރައްވައިފި ނަމަ ގެންގުޅުއްވާނެ ހާރިޖީ ސިޔާސަތާ ގުޅޭ ގޮތުން މުއިއްޒު ވިދާޅުވީ އޭނާ ގެންގުޅުއްވާނީ ކުރީގެ ރައީސް އަބްދުﷲ ޔާމީން ވެސް ގެންގުޅުއްވި ސިޔާސަތު ކަމަށެވެ. އަދި ރައީސް ޔާމީން ގެންގުޅުއްވީ ވަކިކޮޅަކަށް ނުޖެހޭ ސިޔާސަތެއްކަމަށް މުއިއްޒު ވިދާޅުވިއެވެ. ނަމަވެސް ރައީސް ޔާމީންގެ ވެރިކަމުގައި ބައިނަލްއަޤްވާމީ ގިނަ ޤައުމުތަކާއިވަނީ ގުޅުން ކަނޑާލާފައެވެ. ޔާމީންގެ ވެރިކަމުގައި މުޅިންވެސް ރާއްޖެ ބަރޯސާވެފައި އޮތީ ޗައިނާއަށެވެ. އަވަށްޓެރި އެހެން ޤައުމުތަކާއި އޮތް ގުޅުންތައް ހީނަރުވުމުގެ ސަބަބުން އެ 5 އަހަރުގައި ރާއްޖެއަށް ބޮޑެތި ގޮންޖެހުންތަކަކާއި ކުރިމަތިލާންޖެހުނެވެ.