ރިޔާސީ އިންތިޚާބުގެ ދެވަނަ ބުރަށް ކެމްޕޭނަށް ބަދަލުތަކެއް ގެންނާނެ ކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިހެން ވިދާޅުވީ، ރިޔާސީ އިންތިޚާބުގެ ފުރަތަމަ ބުރު، އެއްބުރުން ކާމިޔާބު ނުކުރެވުމާއި ގުޅިގެން، އެމްޑީޕީގެ ޤައުމީ މަޖިލީހުގެ މެމްބަރުންނާއި އެކު، ބޭއްވެވި ބައްދަލު ކުރެއްވުމަށް ފަހުގައެވެ.

ރައީސް ވިދާޅުވީ، ފުރަތަމަ ބުރުގައި ހުރި މައްސަލަތަކަށް މިއަދުކުރީ އެކަންކަން ހައްލުކުރުމަށް ކުރަންޖެހޭ މަސައްކަތްތައް ކަމަށެވެ. އަދި ކެމްޕޭނުގައި ހެދިފައިހުރި ގޯސްތައް ރަނގަޅަށް އެނގިވަޑައިގަންނަވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ރިޔާސީ އިންތިޚާބުގައި ނެރެވުނު ނަތީޖާތައް ދަށްވުމުގެ މައިގަނޑު ސަބަބަކީ، އިންތިޒާމްތަކުގައި ހުރި މައްސަލަތައް ކަމަށެވެ. އަދި ޚާއްސަކޮށް އިންތިޚާބުގެ އެންމެ ފަހު ދެދުވަހު ކަންކަން ދިޔައީ މުޅިން އެންމެ ރަނގަޅަށް ނޫންކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ރިޔާސީ އިންތިޚާބުގެ ފުރަތަމަ ބުރުގައި، ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުއިއްޒަށް ލިބިވަޑައިގަތީ 101،613 ވޯޓެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ލިބިވަޑައިގަތީ، 86،151 ވޯޓެވެ.

ރިޔާސީ އިންތިޚާބު ކާމިޔާބުކުރުމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް އިތުރަށް، 20،000 ވޯޓު ހޯއްދަވަން ޖެހޭނެއެވެ.