Advertisement
ފޮޓޯ: އެމްޑީޕީ
އައްޑޫއަށްޓަކައި ކުރަންވީ ކަމަކީ ރައީސް އިބޫ ހޮވުން: އަސްލަމް
އައްޑޫގެ ތަރައްގީއަށްޓަކައި ހޮވަންވީ ރައީސް އިބްރާހިމް މުހައްމަދު ސޯލިހްކަމަށް އެމަނިކުފާނުގެ ރަނިންމޭޓް މުހައްމަދު އަސްލަމް ވިދާޅުވެއްޖެ އެވެ.
އައްޑޫ ސިޓީ ހިތަދޫގައި ރޭ ބޭއްވި ޖަލްސާގައި ވާހަކަ ދައްކަވަމުން އަސްލަމް ވިދާޅުވީ މި ސަރުކާރުން އައްޑޫގެ ތަރައްގީއަށް ކޮށްދީފައިވާ ކަންކަމާއި ކުރިއަށް އޮތް ދައުރުގައި ކޮށްދޭން މެނިފެސްޓޯގައިވާ ކަންކަން ފުރިހަމަ ކުރުމަށްޓަކައި އައްޑޫ ރައްޔިތުން ރައީސް ހޮވަން ޖެހޭ ކަމަށެވެ.
"ތިބޭފުޅުންގެ މި އައްޑޫއަށް، ތިބޭފުޅުންގެ މި ރާއްޖެއަށް ތިބޭފުޅުންގެ މި ރަށްރަށަށް ކޮށްދެވޭނެ އެންމެ ބޮޑު ހިދުމަތަކީ މިވަގުތު ރައީސް އިބްރާހިމް މުހައްމަދު ސޯލިހް އަށް ދެވަނަ ދައުރެއް ދެއްވުން." އޭނާ ވިދާޅުވި އެވެ.
އައްޑޫގެ ތަރައްގީއަށް މި ސަރުކާރުން ކުރި ކަންކަން ކިރިޔާ ވެސް އަޅާކިޔޭނީ އިނގިރޭސިން އައްޑޫގައި ތިބި އިރު ކުރި ކަންތައްތަކާ ކަމަށް އަސްލަމް ވަނީ މި ޖަލްސާގައި ވިދާޅުވެފައެވެ.
އަންނަ ދައުރެއްގައި އައްޑޫ ސިޓީ ޒަމާނީ ވިޔަފާރި ހަބަކަށް ހަދާނެކަމަށާއި، އިކޯ ޓޫރިޒަމް ތަރައްގީކުރުމާއި، ރޭސިން ޓްރެކެއް އަޅާނެކަމަށް ރައީސް ވަނީ ވިދާޅުވެފައެވެ. މީގެއިތުރުން މަގު ހެދުމާއި ބޯހިޔަވާހިކަން ހައްލު ކުރަން 1000 ފްލެޓް އެޅުމާއި، ހޮސްޕިޓަލް އިތުރަށް ތަރައްގީކުރުމާއި އާރްޓީއެލުން އައްޑޫ ގުޅާލާނެކަމަށްވެސް ރައީސް ވަނީ ވައުދުވެވަޑައިގެންފައެވެ.
