ރިޔާސީ އިންތިޚާބުގެ ކެމްޕޭނަށް އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ ރަނިން މޭޓް މުޙައްމަދު އަސްލަމް އައްޑޫ ސިޓީއަށް ވަޑައިގެންނެވުމުން އެދެބޭފުޅުންނަށް އައްޑޫ ސިޓީގެ ރައްޔިތުންގެ ފަރާތުން ހޫނު މަރުޙަބާއެއް ދަންނަވައިފިއެވެ.

ރައީސުލްޖުމްހޫރިއްޔާ އާއި އަސްލަމް އައްޑޫ ސިޓީއަށް ވަޑައިގެންނެވީ، މިރޭ އިރުއޮއްސުނު ވަގުތުގައެވެ. އެދެބޭފުޅުންނަށް މަރުހަބާ ދެންނެވުމަށް އައްޑޫ ސިޓީ، ގަން އިންޓަރނޭޝަނަލް އެއާޕޯޓަށް ވަރަށް ގިނަ އަދަދެއްގެ ބަޔަކު ޖަމާވިއެވެ. ރައީސަށް މަރުޙަބާ ދެންނެވުމަށް ނުކުތް މީހުންގެ އަދަދު ގިނަވުމުން މަރުހަބާ ދެންނެވުމަށް ހާޟިރުވި މީހުންނާއި ސަލާމްކުރުމަށްވެސް ގަޑިއެއްގެ އިރަށްވުރެ ގިނަ އިރު ހޭދަވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މާދަމާ އައްޑޫ ސިޓީގެ ގުޅިފައިވާ ރަށްތަކަށާއި އަދި އައްޑޫ ސިޓީގެ ވަކިން އޮންނަ ދެރަށް ކަމުގައިވާ، މީދޫ އާއި ހުޅުދޫއަށް ވަޑައިގަންނަވާނެ ކަމުގައިވެސް އެމްޑީޕީން ހާމަކޮށްފައިވެއެވެ.

އައްޑޫ ސިޓީއަކީ، މާލެ ފިޔަވައި އެންމެ ގިނަ މީހުންނަށް ވޯޓު ދިނުމުގެ ޙައްޤުލިބޭ ސިޓީއެވެ. އައްްޑޫގެ ނަތީޖާއަކީ ރިޔާސީ އިންތިޚާބުގެ ނަތީޖާއަށް ވަރަށް ބޮޑަށް އަސަރުކުރާނެ ނަތީޖާއެކެވެ. ރިޔާސީ އިންތިޚާބު އިބޫ އަސްލަމް ކާމިޔާބު ކުރެއްވުން ވެގެންދާނީ، ދިވެހިރާއްޖޭގެ ޖުމްހޫރީ ޙަޔާތުގައި ދައުލަތުގެ ދެވަނައަށް އެންމެ އިސް މަޤާމަށް އައްޑޫ ސިޓީއަށް ނިސްބަތްވެވަޑައިގަންނަވާ ބޭފުޅަކު ވަޑައިގަންނަވާނެ ފުރަތަމަ ފަހަރަށެވެ.

އުފާވެރި އަމާން ރާއްޖެ ކެމްޕޭންގައި އައްޑޫ ސިޓީގައި ބާއްވާ އެންމެ ބޮޑު ކެމްޕޭން ޖަލްސާ މާދަމާރޭގައި ބޭއްވުމަށްވެސް ވަނީ ހަމަޖައްސާފައެވެ.