Advertisement
މިލިޓަރީ މަސައްކަތް ކުރާކަށް ބޭރުގެ ސިފައިންނެއް ނެތް: ރައީސް
މިލިޓަރީ މަސައްކަތެއް ކުރުމަށް އެއްވެސް ޤައުމެއްގެ ސިފައިންނެއް ރާއްޖެއަކު ނެތްކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ. ރައީސް މިހެން ވިދާޅުވީ "ސަންގު ރިޔާސީ ބަހުސް" ގައި ވާހަކަދައްކަވަމުންނެވެ.
ރައީސް ވިދާޅުވީ ބޭރު ގައުމެއްގެ ސިފައިން ރާއްޖޭގައި ތިބުމުގައި މި ސަރުކާރުގައި ވަކި އާ ކަމެއް ނުހިނގާ ކަމަށެވެ. ކުރީގެ ސަރުކާރުތަކުގައި ވެސް ހިނގި ތަމްރީންތަކާއި ގުޅުން ބަދަހިކުރުމުގެ ކަންކަން ކުރިއަށްދާ ކަމަށާއި އެއީ ދޭދޭ ގައުމުތަކާ އެކު އޮންނަ ގުޅުން ބަދަހިކުރުމުގެ އެއްބަސްވުންތަކުގެ ދަށުން ހިނގާ ކަމެއް ކަމަށް ވިދާޅުވި އެވެ.
"ބޭރުގެ ސިފައިން މިލިޓަރީ މަސައްކަތެއް ކުރާކަށް މި ގައުމަކު ނެތް. މިހާރަކު ވެސް ނެތް އިއްޔެއަކު ވެސް ނެތް އޭގެ ކުރިއަކުން ވެސް ނެތް," ރައީސް ވިދާޅުވި އެވެ.
ތަފާތު އެކިއެކި އެކްސަސައިޒްތައް ހިންގަން ބޭރުގެ ސިފައިން ރާއްޖެ އަންނަކަމަށް ރައީސް ވިދާޅުވިއެވެ. އެގޮތުން އިންޑިއާ، ލަންކާ އަދި އެމެރިކާ ސިފައިންވެސް އަންނަކަމަށެވެ. އެ އުސޫލުން ތަމްރީންތަކަށް އަޔަސް މިލިޓަރީ މަސައްކަތެއް ކުރަން މި ގައުމުގައި އެހެން ޤައުމެއްގެ ސިފައިން ގާއިމްވެ ނެތް ކަމަށް ރައީސް ވިދާޅުވި އެވެ.
މި ފަސް އަހަރުގެ ތެރޭގައި ގައުމުތަކާ އެކު ވަރަށް ގާތް ގުޅުމެއް އުފެއްދިއްޖެ ކަން ފާހަގަކުރައްވައި ރައީސް ވިދާޅުވީ އިނގިރޭސި ވިލާތާ އެކު ފްރީ ޓްރޭޑް އެގްރިމަންޓެއްގައި ސޮއިކުރުމުގެ މަސައްކަތް ވެސް ހިނގަމުން އަންނަ ކަމަށެވެ. އެމަނިކުފާނުގެ ޚާރިޖީ ސިޔާސަތު އަބަދުވެސް ބައްޓަންވެފައި އޮންނާނީ އިސް އުފުލޭ ޚާރިޖީ ސިޔާސަތެއްގެ ގޮތުގައި ކަމަށް ވިދާޅުވި އެވެ.
