މޯލްޑިވްސް އިމިގްރޭޝަންގެ އޮފީހެއް ބުދަ ދުވަހު ގދ. ތިނަދޫގައި ހުޅުވައިފިއެވެ. މި އޮފީސް ރަސްމީކޮށް އިފްތިތާހު ކުރެއްވީ ދިވެހިރާއްޖޭގެ ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހްއެވެ. އަރިހުގައި މިނިސްޓަރ އޮފް ޑިފެންސް އަލްއުސްތަޛާ މާރިޔާ އަހުމަދު ދީދީ އާއި އިމިގްރޭޝަންގެ ކޮންޓްރޯލަރ ޖެނެރަލް މުޙައްމަދު އަޙުމަދު ޙުސައިން އާއި ދިވެހިރައްޔިތުންގެ މަޖިލީހުގެ ތިނަދޫ ދާއިރާ ތަމްސީލު ކުރައްވާ ދެ މެމްބަރުންނާއި އަދި ތިނަދޫ ކައުންސިލްގެ ރައީސް ބައިވެރިވެ ވަޑައިގެންނެވިއެވެ.

މި ރަސްމިއްޔާތުގައި ގދ. ތިނަދޫއިން އެންމެ ފުރަތަމަ ޕާސްޕޯޓު ދޫކުރެވުނު ފަރާތަށް ވަނީ ރައީސުލްޖުމްހޫރިއްޔާ ހަނދާނީ ފިލައެއް އަރުއްވާފައެވެ. މި ހަނދާނީ ފިލާ އަރުވާފައިވަނީ ގދ. ތިނަދޫ, އޭޖް, އަލްފާޟިލާ އާތިފާ ޤާސިމް އަށެވެ.

މޯލްޑިވްސް އިމިގްރޭޝަނުން ހާމަކޮށްފައިވާ ގޮތުގައި ޚިދުމަތްތައް ލާމަރުކަޒު ކުރުމަކީ މި ސަރުކާރުގެ މުހިންމު ސިޔާސަތެއްކަމުން، އެ އިދާރާގެ އޮފީސްތައް ރާއްޖޭގެ އެކި ކަންކޮޅުތަކުގައި ހުޅުވައި، ޚިދުމަތްތައް ލާމަރުކަޒު ކުރުމަކީ އެ އިދާރާގެ އިސްތިރާޖީ ޕްލޭންގައި އެކުލެވިފައިވާ މުހިންމު އެއްކަމެވެ. އަދި މިހާތަނަށް، ދިވެހި ޕާސްޕޯޓުގެ ޚިދުމަތް ހއ، ހދ، ޏ އަދި އައްޑު އަތޮޅެއްގައި ލިބެމުން ދާއިރު، ހުވަދޫ އަތޮޅުގައި މި ޚިދުމަތް ފެށުން ވެގެން ދާނީ މުޅި ހުވަދޫ އަތޮޅަށް ވެސް އޭގެ ފައިދާ ކުރާނެކަމަކަށެވެ. ހުވަދޫ އަތޮޅަކީ މާލެއާ ދުރުވެފައި، ދަތުރުކުރުމަށް ފުދޭވަރެއްގެ ހޭދައެއް ކުރަންޖެހޭ އަތޮޅެއް ކަމުގައި ވުމުން، މިފަދަ ޚިދުމަތްތައް ރައްޔިތުންނާ ގާތުން ދޭން ފެށުމަކީ އެފަރާތްތަކުން އުފުލަންޖެހޭ ތަކުލީފުތަކަށް ލުޔެއް ލިބިގެންދާނެ ކަމެކެވެ. 

މީގެ އިތުރުން, ބުދަ ދުވަހުގެ ރޭ ތިނަދޫގައި ބޭއްވި އެމް.ޑީ.ޕީ. ގެ ކެމްޕެއިން ޖަލްސާގައި އިމިގްރޭޝަންގެ ކޮންޓްރޯލަރ ޖެނެރަލް މުޙައްމަދު އަޙްމަދު ޙުސެއިން (ހަނަފީ) ހާމަކުރެއްވި ގޮތުގައި, ތިނަދޫގައި އިމިގްރޭޝަންގެ އިމާރާތެއް ޤާއިމްކޮށް, މާލެ ފިޔަވާ ދެވަނަ އަށް ޕާސްޕޯޓު ޑިސްޓްރިބިއުޝަން ސެންޓަރަކަށް ހެދުމަށް ބޭނުންވަނީ ތިނަދޫ އިމިގްރޭޝަން އޮފީސް ކަމުގައި ފާހަގަ ކުރެއްވިއެވެ.

ދިވެހި ޕާސްޕޯޓުގެ ޚިދުމަތަށް އެދި މިހާރު ހުށަހެޅެނީ، އިމިގްރޭޝަންގެ ޑިޖިޓަލް ޕްލެޓްފޯމް 'އިމުގާ' މެދުވެރިކޮށެވެ. އަދި މި ޕޯޓަލް މެދުވެރިކޮށް ޕާސްޕޯޓާއި ހަވާލުވުމަށް މިހާރު ގދ. ތިނަދޫ އިމިގްރޭޝަން އޮފީސް އިޙްތިޔާރު ކުރެވޭނެކަމަށް އިމިގްރޭޝަނުން ހާމަކޮށްފައިވެއެވެ. 

އިމިގްރޭޝަނުން އިތުރަށް ފާހަގަކޮށްފައިވާ ގޮތުގައި އަޅުގަނޑުމެންގެ އަމާޒަކީ އިމިގްރޭޝަންގެ ޚިދުމަތްތައް ލާމަރުކަޒީކޮށް ރައްޔިތުންނަށް ލުއިފަސޭހަކަމާއެކު ޚިދުމަތްތައް ހޯދޭނެ މަގު ތަނަވަސް ކޮށްދިނުމެވެ.