Advertisement
ފެންނަނީ ބޮޑެތި ސިޓީތަކުންވެސް ތާއީދު އޮތްތަން: ރައީސް
ރާއްޖޭގެ އާބާދީ ބޮޑެތި ސިޓީތަކުގައި އެމަނިކުފާނަށް ތާއީދު އޮތްތަން ފެނިވަޑައިގެންފިކަމަށް އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ތ. އަދި ލ. އަށް ކުރެއްވި ކެމްޕެއިން ދަތުރުފުޅު ނިންމަވައިލެއްވުމަށްފަހު ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވީ، ރިޔާސީ އިންތިހާބުގައި ބޮޑު އަޣުލަބިއްޔަތެއް އެމްޑީޕީ އަށް ލިބޭ ތަން މިހާރު ވެސް ފެނިވަޑައިގަންނަވާ ކަމަށެވެ. ރައީސް ވިދާޅުވީ، އަދިވެސް ރާއްޖޭގެ ބައެއް އަތޮޅުތަކަށް ކެންޕެއިން ދަތުރުތަކުގައި ނުދެވޭކަމަށެވެ. ނަމަވެސް ކުރިއަށްއޮތް ދުވަސްތަކުގައި އެ ރަށްތަކަށް އެމަނިކުފާނު ވަޑައިގަންނަވާނެކަމަށެވެ. އިންތިހާބުގައި ހޯއްދެވޭނެ ޕަސެންޓް އެނގިވަޑައިގަންނަވާނީ އެއަށްފަހުގައިކަމަށް އެމަނިކުފާނު ވަނީ ވިދާޅުވެފައެވެ.
"އަދި އަޅުގަނޑު އައްޑޫ ސިޓީއަކަށް ނުދަން. ކުޅުދުއްފުއްޓަކަށް އަދި ނުދެވޭ. ޅ. އަތޮޅަކަށް ނުދެވޭ. އިރާދަކުރެއްވިއްޔާ ކުރިއަށް އޮތް 3-4 ދުވަހުގެ ތެރޭގައި އެ އަތޮޅުތަކަށް އަޅުގަނޑުމެން ދާނަން. ދެން މާލޭގައި އަދި އެބަޖެހޭ އަޅުގަނޑުގެ ޑޯ ޓު ޑޯ އާއި ބައެއް ހަރަކާތްތައް އެބަހުރި،" ރައީސް ވިދާޅުވިއެވެ.
އެމްޑީޕީ ދޫކުރައްވައި ވަޑައިގެންނެވި ބޭފުޅުންނަށް އަބަދުވެސް އެޕާޓީން މަރުހަބާކިޔާނެކަމަށާއި އަދި ބައެއް މެންބަރުން އަލުން އެމްޑީޕީއާއި ގުޅިވަޑައިގަންނަވަމުން އަންނަކަމަށް ރައީސް ވަނީ ފާހަގަކުރައްވާފައެވެ.
