ލ.އަތޮޅުގައި މިއަހަރު ނިމުމުގެ ކުރިން އާރުޓީއެލްގެ ޚިދުމަތް ފަށާނެކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރިޔާސީ އިންތިހާބުގެ ކެމްޕެއިނަށް ލ.އަތޮޅަށް މިހާރު ކުރައްވަމުންގެންދާ ދަތުރުފުޅުގައި ލ. މާބައިދޫގައި ވާހަކަފުޅުދައްކަވަމުންނެވެ.

ލޯކަލް ޓުއަރިޒަމް ވިޔަފާރި ފަށާ ފުޅާކުރުމަށް އެންމެ ބޭނުންވަނީ ރަނގަޅު ދަތުރުފަތުރުގެ ނިޒާމެއްކަން ފާހަގަކުރައްވައި ރައީސް ވިދާޅުވީ، މިއަހަރުގެ ތެރޭގައި ލ. އަތޮޅުގައި އާރުޓީއެލްގެ ހިދުމަތް ފަށާނެކަމަށެވެ. ލ. އަތޮޅަކީ ރަނގަޅު ދަތުރުފަތުރަކާއިއެކު ފަތުރުވެރިކަން ފުޅާކުރެވިދާނެ ރަށެއްކަން ފަތުރުވެރިކަމުގެ މާހިރުން ވިދާޅުވެފައިވާކަމަށް ރައީސް ފާހަގަކުރެއްވިއެވެ.

މީގެއިތުރުން މާބައިދޫގެ ބޮޑެތި މަގުތައް ތާރުއަޅައިގެން ޒަމާނީ ފެންވަރަށް ތަރައްޤީކޮށް، އެރަށު ސިއްޙީމަރުކަޒުގެ ޚިދުމަތް ފުޅާކޮށް ސައުވީސް ގަޑިއިރަށް ބަދަލުކޮށްދެއްވާނެކަމަށް ރައީސް ވިދާޅުވިއެވެ.

މިހާރު ޕްލޭންކޮށް ކޮންސެޕްޓް ހަދާފައިވާ އެރަށުގެ ގޮނޑުދޮށް ހިމާޔަތް ކުރުމުގެގެ މަސައްކަތާއެކު މޫދަށް އެރޭނެ ސަރަހައްދެއް ތަަރައްގީ ކުރުމާ ޒުވާނުންނަށް ޚާއްސަކޮށް ޖިމަކާއި، ޔޫތް ސެންޓަރެއް އެރަށުގައި ތަރައްޤީކޮށްދެއްވާނެކަމަށް ރައީސް ވިދާޅުވިއެވެ.