ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްގެ ވައުދުފުޅާއި އެއްގޮތައް މާލޭގެ ރައްޔިތުންނަށް ބިން ކަނޑައި ރޯނު ދަމައި ގޯތީގެ ރަޖިސްޓްރީ ހަވާލުކުރަން ފަށައިފިއެވެ. ގޯތީގެ ރަޖިސްޓްރީ ހަވާލުކުރަން ފަށާފައިވަނީ އިއްޔެއެވެ. 

ރައީސްގެ ގޯތި ދެއްވުމަށް ވެވަޑައިގެންނެވި ވައުދާއި އެއްގޮތަށް ފުރަތަމަ ކުރެވުނު މަސައްކަތަކީ ގޯތި ލިބޭނެ ފަރާތްތައް ކަނޑައެޅުއްވުމެވެ. އެ މަސައްކަތުގެ ތެރެއިން ސަރުކާރަށް ފެނުނީ އެތައް ބަޔަކު ބޯހިޔާވަހިކަމަށް އެދިއެދި ތިބި މަންޒަރެވެ. އެހެންކަމުން އެއްވެސް ރައްޔިތެއްގެ އުއްމީދު ފަނޑުވިޔަނުދިނުމަށްޓަކައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނިންމެވީ ގޯއްޗަށް އެދި ހުށަހެޅި މީހުންގެ ތެރެއިން ޝަރުތު ހަމަވާ ހުރިހާ މީހުންނަށް ގޯތި ދެއްވުމަށެވެ. އަދި އެކަމަށް އިތުރު ބޭނުންވާ ބިން ހިއްކެވުމުގެ މަސައްކަތް ސަރުކާރުން ވަނީ ފައްޓާވާފައެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ބަންޑާރަގޯތި ދޫކުރުމަށްޓަކައި ހިންގާ ބިންވެރިޔާ ސްކީމުގެ ދަށުން ގޯއްޗަށް ހުޅުވާލި ފުރުސަތުގައި ޝަރުޠު ހަމަވީ 19639 މީހުންނަށް ގޯތި ލިބުނެއެވެ. އެއީ 9000އަށްވުރެ ގިނަ ބިމެވެ.

ބިންވެރިޔާ ސްކީމުގެ ދަށުން މާލެ ސަރަޙައްދުން ގޯތި ލިބޭ ފަރާތްތަކާ ގޯތި ޙަވާލުކުރުން ކުރިއަށްދަނީ ހުޅުމާލެ ސިންތެޓިކް ޓްރެކްގައެވެ. މިއީ އެތަކެއް އަހަރެއް ވަންދެން މާލޭގެ ރައްޔިތުން ކުރަމުންދިޔަ އިންތިޒާރެކެވެ. ގޯތި ލިބުނު މީހުން ތިބީ ވަރަށް ބޮޑަށްވެސް އުފާވެފައެވެ. އަދި މިއީ އެތައް އަހަރެއްގެ ދިގު އިންތިޒާރެއްގެ ނިމުންކަން އެމީހުން ފާހަގަކުރެއެވެ. 

ބިންވެރިޔާ ސްކީމްގެދަށުން ހުޅުމާލެއިން 1351 ބިން، ގުޅިފަޅުން 2218 ބިން އަދި ގިރާވަރު ފަޅުން 5432 ބިން ދީފައިވެއެވެ. އެއީ ޖުމްލަ 9001 ގޯއްޗެވެ. މި ގޯތި ތަކުގެ ތެރެއިން 1250 އަކަފޫޓާއި 1650 އަކަފޫޓާއި 2050 އަކަފޫޓުގެ ގޯތިތައް ދެއްވާނީ ހުޅުމާލެއާއި، ގުޅިފަޅާއި ގިރާވަރު ފަޅުންނެއެވެ. އަދި 2450 އަކަފޫޓުން ފެށިގެން 4000 އަކަފޫޓާ ދެމެދުގެ ގޯތިތައް ދޫކުރައްވާނީ ހުޅުމާލެއާއި ގުޅިފަޅުންނެވެ  

ޕްލޭނިން މިނިސްޓްރީން ވިދާޅުވީ، ދެން ކޮންމެ ދުވަހަކުވެސް ގޯތި ކަނޑައި ރަޖިސްޓްރީ ހަވާލުކުރުމުގެ މަސައްކަތް ކުރިއަށްދާނެކަމަށެވެ. އަދި ނޮވެމްބަރ 5 ވަނަ ދުވަހުގެ ކުރިން ހުރިހައި ގޯއްޗެއް ކަނޑައި ރަޖިސްޓްރީ ހަވާލުކުރާނެކަމަށެވެ. 

ގޯއްޗާ ހަވާލުވުމަށާއި ގޯތި ލިބޭ ފަރާތްތަކުން ހާޒިރުވާނެ ދުވަހާއި ގަޑި ހައުސިންގ މިނިސްޓްރީގެ ފަރާތުން އަންގަމުން ގެންދާނެވާހަކަ އެމިނިސްޓްރީން ވިދާޅުވެއެވެ. އެމިނިސްޓްރީން ވިދާޅުވީ ގޯތި ލިބޭ ފޯމުގައި ހިމެނޭ ގޯތި ލިބޭ ފަރާތަކުން ގޯއްޗާ ހަވާލުވުމަށާއި ގޯތި ދޫކުރުމުގެ އެއްބަސްވުމުގައި ސޮއިކުރުމަށް ބަދަލުގައި އެހެން ފަރާތެއް އައްޔަނުކުރާނަމަ "ގެދޮރުވެރިން ޕޯޓަލް" ގައި އެޓޭޗްކޮށްފައިވާ ޕަވަރ އޮފް އެޓާނީ ފުރިހަމަކުރެއްވުމަށްފަހު ނޮޓޮރައިޒްކޮށް، ގޯއްޗާ ހަވާލުވުމަށާއި ގޯތި ހަވާލުވުމުގެ އެއްބަސްވުމުގައި ސޮއިކުރުމަށް ފޮނުވާ ފަރާތާއި ޙަވާލުކުރަށްވަން ވާނެކަމަށެވެ.

ގޯއްޗާ ޙަވާލުވުމަށާއި ގޯތި ޙަވާލުކުރުމުގެ އެއްބަސްވުމުގައި ސޮއިކުރަން އަންނަ ފަރާތްތަކުން ގޯތި ލިބޭ ފަރާތްތަކުގެ އައިޑީ ކާޑުގެ ކޮޕީ، އަދި ބަދަލުގައި ސޮއި ކުރަން އަންނަ ފަރާތެއްނަމަ ގޯތި ދޫކުރުމުގެ އެއްބަސްވުމުގައި ސޮއިކުރުމަށް އައްޔަނުކޮށްފައިވާ ޕަވަރ އޮފް އެޓާނީގެ އަސްލާއި، އައި.ޑީ ކާޑުގެ ކޮޕީ ހިފައިގެން ދިއުމަށް މިނިސްޓްރީންވަނީ އަންގާވަފައެވެ.ގޯތި ޙަވާލުކުރުމުގެ އެއްބަސްވުމުގެ ނަމޫނާ އާއި ޕަވަރ އޮފް އެޓާނީ މިއަދުން ފެށިގެން "ގެދޮރުވެރިން ޕޯޓަލް" އިން ފެންނަން ހުންނާނެ ކަމަށްވެސް އެމިނިސްޓްރީން ވިދާޅުވެއެވެ.