ރައީސް އިބްރާޙިމް މުޙައްމަދު ޞާލިޙް މުޅި ރާއްޖެއަށް ގެނައި ތަރައްޤީ ފެނި, އެކަން ތަޖުރިބާ ކުރަމުންދާ ރައްޔިތެއްގެ ހައިސިއްޔަތުން, އެ މަނިކުފާނު ދެވަނަ ދައުރަކަށް އިންތިހާބު ކުރުމަށް ދިވެހިރާއްޖެއަށް ބޭނުންޖެހިފައިވާ މިންވަރު ހާމަކޮށްދީ,  ހުވަދޫއިން ރައީސަށް އޮތް ތަރުހީބު ބަރުތީލަކޮށްލަދޭ މާނަ ފުން ލަވައެއް ސޯޝަލް މީޑިއާގައި އާންމުކޮށްފިއެވެ. "އެކްސް" މެދުވެރިކޮށް މި ލަވަ އާންމުކޮށްފައިވަނީ މިހާރު މޯލްޑިވްސް އިމިގްރޭޝަންގެ ކޮންޓްރޯލަރ ޖެނެރަލްގެ މަގާމުގައި ހުންނެވި މުޙައްމަދު އަޙްމަދު ޙުސެއިން (ހަނަފީ) އެވެ. 

ލަވަ އާންމުންނާއި ޙިއްސާ ކުރައްވަމުން ހަނަފީ ވިދާޅުވެފައިވަނީ, މުޅި ހުވަދޫ ގޮވަމުން ދަނީ ރައީސް ޞާލިޙް ދެވަނަ ދައުރަކަށް އިންތިހާބު ކުރުމަށް ކަމަށާއި, އެ މަނިކުފާނު ވަނީ މުޅި ރާއްޖޭގައި މައުނަވީ ތަރައްޤީގެ ބިންގާ އަޅައިދީފިކަމަށެވެ. އަދި ކުރިޔަށް އޮތް ރިޔާސީ އިންތިހާބު އިރާދަކުރެއްވިއްޔާ ރައީސް ޞާލިޙް ކާމިޔާބު ކުރައްވާނީ އެއް ބުރުން ކަމަށް ވެސް ހަނަފީ ވިދާޅުވެފައިވެއެވެ. 

"އުފާވެރި އަމާން ރާއްދެޔާ"  ކިޔާ މި ލަވައިގައި ޖުމްލަ ގޮތެއްގައި ކިޔާދީފައިވަނީ ރައީސް ޞާލިޙްގެ މި ދައުރުގައި ވަކި ރަށެއް ބާކީ ނުކޮށް, މުޅި ރާއްޖެ ތަރައްޤީކުރުމުގައި ހޯދާފައިވާ ބޮޑު ކުރިއެރުންތަކުގެ ވާހަކައާއި, އަދި ޙާއްސަކޮށް ޒުވާނުންނަށް ހޯދައިދިން ގިނަ ފުރުސަތުތަކުގެ ވާހަކައެވެ. ލަވައިގައި ބުނާގޮތުން މިއީ އެންމެންނަށް ވެސް ފެނި މިއަދާއި ހަމައަށް އައިއިރު ތަޖުރިބާ ކުރެވިފައި އޮތް ހަޤީގަތެކެވެ.

ހުވަދޫ ބަހުން ހުށަހަޅާދީފައިވާ މި ލަވައިގެ ވީޑިއޯ "އެކްސް" ގައި ހިއްސާކުރިއިރު, އެ ލަވައިގެ އޯޑިއޯ ޑައުންލޯޑު ކުރެވޭނެ ލިންކެއް ވެސް ހަނަފީ ވަނީ ހިއްސާ ކޮށްފައެވެ.

ލަވައިގެ އޯޑިއޯ ޑައުންލޯޑު ލިންކު: https://bit.ly/3P9GkcS

ހުވަދޫގެ ވަކިވަކި ރަށްރަށުގެ ތަރައްޤީއަށް ގިނަ ކަންތައްތަކެއް ސަރުކާރުން ކޮށްދީފައިވާއިރު އަދި ކޮށްދެއްމުންދާއިރު, މި ފަހަކުން ވަނީ މުޅި ހުވަދޫގައި އާރު.ޓީ.އެލް ފެރީގެ ޚިދުމަތްވެސް ފަށާފައެވެ. އަދި މިހާރު އެ އަތޮޅުން ފުވައްމުލަކަށާއި އައްޑޫއަށް ދަތުރު ކުރެވޭނެހެން މިވަނީ އާރު.ޓީ.އެލް މެދުވެރިކޮށް ގުޅާލާފައެވެ.