Advertisement
ޑރ. ޢަބުދުﷲ މަޢުސޫމް އެމްޑީޕީއަށް ސޮއެކުރެއްވުން ---
ޓޫރިޒަމް މިނިސްޓަރ ޑރ ޢަބުދުﷲ މަޢުސޫމް އެމްޑީޕީއަށް ސޮއެކުރައްވައިފި
ޓޫރިޒަމް މިނިސްޓަރ ޑރ ޢަބުދުﷲ މަޢުސޫމް އެމްޑީޕީއަށް ސޮއެކުރައްވައިފިއެވެ.
އެމްޑީޕީން މިރޭ ކުރި ޓްވީޓެއްގައި ވަނީ، ޑރ މަޢުސޫމް އެމްޑީޕީއާ ގުޅިވަޑައިގެންނެވިކަން ހާމަކުރައްވައި އެމަނިކުފާނަށް މަރުޙަބާ ދަންނަވާފައެވެ.
ޑރ މަޢުސޫމަކީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރިޔާސީ ދެވަނަ ދައުަރަކަށް ކުރިމަތިލައްވާނެކަން އިޢުލާނުކުރެއްވުމާއި އެކު، އެކަމަށް ތާއީދު ކުރައްވާކަން އެންމެ ފުރަތަމަ ހާމަކުރެއްވި ޖުމްހޫރީޕާޓީގެ އިސްބޭފުޅުންގެ ތެރޭގައި ހިމެނިވަޑައިގެންނެވި ބޭފުޅެކެވެ.
ޓޫރިޒަމް މިނިސްޓަރުގެ މަޤާމަށް ޑރ މައުސޫމް ވަޑައިގެންނެވީ، ޖުމްހޫރީޕާޓީގެ ސްލޮޓެއްގައި ނަމަވެސް، ޖުމްހޫރީޕާޓީން އެމްޑީޕީއާއެކު ކޯލިޝަން ނުހަދައި ވަކިން ރިޔާސީ އިންތިޚާބުގައި ވާދަކުރެއްވުމަށް ނިންމުމާއިއެކު، 7 އޮގަސްޓް 2023ގައި ޑރ މައުސޫމް ވަނީ ޖުމްހޫރީޕާޓީން ވަކިވެވަޑައިގެންފައެވެ.
ފަތުރުވެރިކަމުގެ ދާއިރާއިން، ޕީއެޗްޑީ ޙާސިލްކުރައްވާފައިވާ، ޑރ ޢަބުދުﷲ މަޢުސޫމަކީ، ރައީސް މައުމޫނުގެ ދައުރުގައި ވަޒީރުކަންވެސް ކުރެއްވި، އަދި ރައްޔިތުންގެ މަޖިލީހުގެ މެމްބަރުކަންވެސް ކުރެއްވި ބޭފުޅެކެވެ.
