މިއަންނަ އަހަރުގެ ޖެނުއަރީ މަހުން ފެށިގެން ސަރުކާރުގެ ހުރިހާ މުވައްޒަފުންނަށް %40 މުސާރަ ބޮޑުކުރައްވާނެ ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރިޔާސީ އިންތިޚާބުގެ ކެމްޕޭނުގައި، ބ. ތުޅާދޫއަށް ވަޑައިގެން އެރަށުގައި މިރޭ ބޭއްވި ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ދައުލަތުގެ މުވައްޒަފުންގެ ގޮތުގައި ތިބި، 44281 ފަރާތަކަށް، ޖެނުއަރީމަހުން ފެށިގެން އެންމެ ދަށްވެގެން %40 މުސާރައިގެ ކުރިއެރުން ލިބޭނެ ކަމަށެވެ. ރައީސުލްޖުމްހޫރިއްޔާ ވިދާޅުވީ، ޕޭ ހާމަނައިޒޭޝަން ނިންމާނީ ދައުލަތުގެ ހުރިހާ މުވައްޒަފުންގެ މުސާރައަށް ހެޔޮ ބަދަލެއް ގެނެސްގެންކަމަށެވެ. މިގޮތުން، ސިފައިންނާއި ފުލުހުން އަދި ޝަރުއީ ދާއިރާގެ ހުރިހާ މުވައްޒަފުންނާއި، ކަރެކްޝަންސް ކަސްޓަމްސް، އިމިގްރޭޝަން އަދި އިމާމުންނާއި މުދިމުންނާއި،  ސިވިލް ސާވިސްގެ ހުރިހާ މުވައްޒަފުންނާއި ޖުޑީޝަރީގެ ހުރިހާ މުވައްޒަފުންނާއި ކައުންސިލުގައި މަސައްކަތް ކުރާ އިދާރީ މުވައްޒަފުންގެ މުސާރައަށް ހެޔޮ ބަދަލެއް އަންނަ ތަން އަންނަ ޖެނުއަރީން ފެށިގެން ފެނިގެންދާނެކަމުގައި އެމަނިކުފާނު ވިދާޅުވިއެވެ.

މިޖަލްސާގައި ރައީސް ވިދާޅުވީ، އަންނަ އަހަރަށް ހުށައަޅުއްވާ ދައުލަތުގެ ބަޖެޓުގައި މުސާބޮޑުކުރުމަށް ބޭނުންވާ ފައިސާ ހިމަނުއްވާނެ ކަމަށެވެ. މީގެ އިތުރުން އެމަނިކުފާނު ވަނީ، މުސާރަތަކަށް އެކި ދާއިރާތަކުން އަންނާނެ ބަދަލުތަކާއި، މުސާރައަށް އިތުރުވާނެ މިންވަރުގެ ތަފްސީލްތައް ޙިއްޞާކުރައްވާފައެވެ.

މިގޮތުން ރައީސުލްޖުމްހޫރިއްޔާ ވިދާޅުވީ، ފުލުހުންގެ ކޮންސްޓަބަލެއްގެ މުސާރަ، 11,000ރ. އިން 15,400ރ. އަށް ބޮޑުވާނެ ކަމަށާއި، ފުލުހުންގެ ޗީފް އިންސްޕެކްޓަރެއްގެ މުސާރަ 34,300ރ. އިން 48,000ރ. އަށް ބޮޑުވާނެ ކަމަށެވެ. އަދި ސިފައިންގެ ޕްރައިވެޓަކަށްލިބޭ މުސާރަ 11,500ރ. އިން 16,100ރ. އަށް ބޮޑުވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ކައުންސިލްތަކުގެ އިދާރީ މުވައްޒަފުންގެ މުސާރަ ކުޑަވުމުގެ މައްސަލަތައް ކައުންސިލްތަކުން މީގެކުރިންވެސް ފާހަގަކޮށްފައިވާއިރު، ރައީސުލްޖުމްހޫރިއްޔާ ވިދާޅުވީ، ކައުންސިލުތަކުގެ އިދާރީ މުވައްޒަފުންގެ މުސާރަ 7,200ރ. އިން 10,500ރއަށް ބޮޑުވެގެން ދާއިރު، ސިވިލް ސާވިސްގައި ޑިރެކްޓަރުންގެ މުސާރަ 16,000ރ. އިން 23,200ރ. އަށް ބޮޑުވެގެންދާނެ ކަމަށެވެ.

ޕޭކޮމިޝަނުން ޕޭހާމަނައިޒޭޝަންގެ މަސައްކަތްތައް ކުރަމުން ދާއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުން ވަނީ، މުދައްރިސުންނާއި، ޞިއްޙީ ދާއިރާގެ މުވައްޒަފުންގެ މުސާރައަށްވެސް މިދައުރުގެ ތެރޭގައި އެކަށީގެންވާ ހެޔޮބަދަލެއް ގެނެސްދީފައެވެ.