ބިންވެރިޔާ ސްކީމްގެ ދަށުން ގޯތި ލިބުނު ފަރާތްތަކަށް މިހަފްތާގެ އަންގާރަ ދުވަހުންފެށިގެން ގޯތިތައް ހަވާލުކުރަންފަށާނެކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިގެން ވިދާޅުވީ، މިއަދު މިލަދުންމަޑުލު ދެކުނުބުރީގެ ރަށްރަށަށް ފެއްޓެވި ކެމްޕޭން ދަތުރުފުޅުގައި މިއަދު އެއަތޮޅު ކުޑަފަރީއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ސަރުކާރުގެ ޕްލޭނަކީ މިމަހުގެ 15 ވަނަ ދުވަހުން ފެށިގެން ގޯތިތައް ހަވާލުކުރުމުގެ މަސައްކަތް ފަށާއި ކުރިޔަށް ގެންދިޔުންކަމުގައި ރައީސުލްޖުމްހޫރިއްޔާ ވިދާޅުވިއެވެ.

މާލޭގެ ރައްޔިތުންނަށް ބިންކަނޑައި ގޯތި ދެއްވުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރިޔާސީ ވަޢުދެކެވެ. މިގޮތުން ހައުސިންގ މިނިސްޓްރީން ހާމަކޮށްފައިވާ ގޮތުގައި އެންމެ ފުރަތަމަ ގޯތިދޭން ފަށާނީ ހުޅުމާލެއިންނެވެ. އަންގާރަ ދުވަހުން ފެށިގެން ހުޅުމާލެއިންދޭ ގޯތިތައް ހަވާލުކުރުމުގެ މަސައްކަތް ފަށާނެއެވެ.

ރައީސުލްޖުމްހޫރިއްޔާ ނިންމަވާފައި ވަނީ ހުޅުމާލެއިން 1000 ގޯތި، ގުޅިފަޅުން 2000 ގޯތި، އަދި ގިރާވަރުފަޅުން 1000 ގޯއްޗެވެ.

ބިންވެރިޔާ ސްކީމްގެ ދަށުން ގޯތި ބޭނުންވާ ފަރާތްތަކަށް ހުޅުވާލުމުން، 23،088 މީހުން ފޯމު ހުށައެޅިއެވެ. އަދި ގޯއްޗަށް ޝަރުޠުހަމަވި އެންމެންނަށް ގޯތި ދެވެންދެން ބިންވެރިޔާ ސްކީމް ކުރިޔަށް ގެންދިޔުމަށްވެސް ރައީސް ވަނީ ނިންމަވާފައެވެ.