ރިޔާސީ އިންތިހާބުގައި ވާދަކުރައްވާ ހުރިހައި ކެނޑިޑޭޓުންނަށްވެސް ކެމްޕޭން ކުރުމުގެ ފުރުސަތު، ދީފައިވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

'އުފާވެރި އަމާން ރާއްޖެ' ކެމްޕޭން ދަތުރުފުޅުގައި، ގއ. ކޮލަމާފުށީގައި ވާހަކަދައްކަވަމުން ރައީސް ވިދާޅުވީ، މީގެ ކުރީގެ ސަރުކާރުތަކުން ކޮށްފައިވާ ފަދަ އަނިޔާވެރި ކަންކަން މި ސަރުކާރުން ނުކުރާނެ ކަމަށެވެ. ރައީސް ވިދާޅުވީ،  ގޮތުގައި، 2018 ވަނަ އަހަރުގެ ރިޔާސީ އިންތިހާބަށް ވޯޓުލާން އޮތް ދުވަހުގެ އެއް ދުވަސް ކުރިން އެމްޑީޕީގެ ކެމްޕޭނުގައި ހަރަކާތްތެރިވި 18 އެކްޓިވިސްޓުން ޖަލަށްލައި އެ މީހުންނަށް ވޯޓު ލުމުގެ ހައްގު ގެއްްލުވާލިކަމަށެވެ. ނަަމަވެސް މި ސަރުކާރުން އެފަދަ ކަންކަން ނުކުރައްވާނެކަމަށް ރައީސް ވަނީ ވިދާޅުވެފައެވެ.

"ސާފުކޮށް، ކެމްޕޭން ކުރުމުގެ ފުރިހަމަ ޖާގަ، އަށެއް ކީއްކުރަން، 12 ކެންޑިޑޭޓުން ކުރިމަތިލެއްވި ނަމަވެސް، އެ ފުރުސަތު އޮންނާނެ. ކެމްޕޭން ކުރައްވަންވީ. ހިޔާލު ފާޅު ކުރަންވީ. ހާމަކަން ބޮޑު ގޮތެއްގައި އެ ޖާގަ އެ އޮތީ ދީފައި،" ރައީސް ވިދާޅުވި އެވެ.

މި އަހަރުގެ ރިޔާސީ އިންތިހާބުގައި ނިންމާ ނިންމުމުގެ ސަބަބުން އަނެއްކާވެސް އެ ދުވަސް އިއާދަ ވެދާނެ ކަމަށް ވިދާޅުވެ، ރައީސް އެދިވަޑައިގެންނެވީ އެ މަނިކުފާނަށް ވޯޓު ދިނުމަށެވެ.