މި ސަރުކާރުގެ 5 އަހަރު ނިމޭއިރު، ރާއްޖޭގެ އުފެއްދުންތެރިކަމުގެ ނިސްބަތް ވަރަށް ބޮޑުތަން އިތުރުކުރެވިފައިވާކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ. މިނިސްޓަރ މިހެން ވިދާޅުވީ ގދ.ގައްދޫގައި ބޭއްވި އެމްޑީޕީގެ ޖަލްސާއެއްގައި ވާހަކަފުޅުދައްކަވަމުންނެވެ.

އަމީރު ވިދާޅުވީ މި 5 އަހަރުގެ ތެރޭގައި އުފެއްދުންތެރިކަން 81 ބިލިއަން ރުފިޔާއިން، 107 ބިލިއަން ރުފިޔާއަށް އިތުރުކުރެވޭނެ ކަމަށެވެ. މިނިސްޓަރ އަމީރު ވިދާޅުވީ 2018ވަނަ އަހަރު، މިސަރުކާރުން ވެރިކަމާއި ހަވާލުވިއިރު ރާއްޖޭގެ އުފެއްދުންތެރިކަން ނުވަތަ ޖީޑީޕީ ހުރީ 81 ބިލިއަން ރުފިޔާގައިކަމަށެވެ. ނަމަވެސް މި 5 އަހަރު ނިމޭއިރު މި އަދަދު 107 ބިލިއަން ރުފިޔާއަށް އިތުރުކުރެވޭނެކަމަށެވެ.

އަމީރު ވިދާޅުވީ ކޯވިޑްގެ ޙާލަތު ކުރިމަތިނުވެ، ސަރުކާރުގެ ޕްލޭނާއި އެއްގޮތައް ކަންކަން ދިޔަނަމަ ޖީޑީޕީ 140 ބިލިއަން ރުފިޔާއަށް އިތުރުކުރެވޭނެކަމަށެވެ. ކޯވިޑްގެ ޙާލަތުގައިވެސް، ރާއްޖޭގެ އިޤްތިޞާދީ ޙާލަތު ވަރަށް ރަނގަޅަށް ހިފެހެއްޓުނުކަން މިނިސްޓަރ ފާހަގަކުރެއްވިއެވެ. އެގޮތުން އެންމެ ދަށަށް އިޤްތިޞާދު ދިޔަ ހާލަތުގައިވެސް، 2018ވަނަ އަހަރަށްވުރެ ބޮޑު ކުރިއެރުމެއް ހޯދިކަން މިނިސްޓަރ ފާހަގަކުރެއްވިއެވެ.

Advertisement

މިނިސްޓަރ ވިދާޅުވީ ކޯވިޑާއެކު ރާއްޖޭގެ ޖީޑީޕީ 57 ބިލިއަނަށް ދަށަށް ދިޔަނަމަވެސް، ރާއްޖޭގެ ޔޫސަބަލް ރިސަރވް ހުރީ 177 މިލިއަން ޑޮލަރުގައިކަމަށެވެ. 2018ވަނަ އަހަރު ރާއްޖޭގެ ޔޫސަބަލް ރިސަރވަކީ، 162 މިލިއަން ޑޮލަރެވެ. 2021ވަނަ އަހަރު ނިންމާލީ، 413 މިލިއަން ޑޮލަރުގެ ޔޫސަބަލް ރިސަރވަކާއެކު ކަމަށްވެސް ފިނޭންސް މިނިސްޓަރ ވިދާޅުވިއެވެ.