ރާއްޖެއަށް އެޑިއުކޭޝަނަލް ޓޫރިޒަމް ތައާރަފުކުރަން އެމްޑީޕީގެ މެނިފެސްޓޯގައި ހިމަނައިފިއެވެ. މިކަން ހާމަކޮށްފައިވަނީ އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްއެވެ.

ރައީސް ހުވަދުއަށް ކުރައްވާ ރިޔާސީ ކެމްޕެއިން ދަތުރުފުޅުގައި މިއަދު ހެނދުނު ގދ. ވާދޫގައި ބޭއްވި ޖަލްސާގައި އެމަނިކުފާނު ވިދާޅުވީ މަތީ ތައުލީމަކީ އަންނަ ދައުރުގައި އެންމެ އިސްކަންދެއްވާނެ އެއް ދާއިރާ ކަމަށެވެ. އަދި އެ ދާއިރާ ކުރިއަރުވަން އެމްޑީޕީގެ މެނިފެސްޓޯގައި މިފަހަރު ވަރަށް ގިނަ ކަންކަން ހިމަނާފައިވާނެ ކަމަށް ރައީސް ވިދާޅުވި އެވެ.

ރައީސް ވިދާޅުވެފައިވަނީ މަތީ ތައުލީމާއި ތަމްރީނުގެ ސިޔާސަތަކީ އެޑިއުކޭޝަނަލް ޓުއަރިޒަމަށް ފަހިވާ ގޮތަށް ބައްޓަންކޮށްފައިވާ ސިޔާސަތަކަށް ހަދާނެ ކަމަށެވެ. އަދި މަތީ ތައުލީމާއި ތަމްރީނުގެ ދާއިރާ މުޅި ދުނިޔެއަށް ހުޅުވާލެވިގެން ކޯސްތަކާއި ސްކޮލަޝިޕްތައް ހުރިހާ ޒުވާނުންނަށް ފަހިކޮށްދޭނެ ކަމަށެވެ. އަދި ރާއްޖެއިން ބޭރުން ކުދިން ކިޔަވަން ރާއްޖެއައުމަށް ބާރުއެޅުމުގެ ގޮތުން ސްޓޫޑަންޓް ވިސާ ވެސް ތައާރަފު ކުރާނެކަން ރައީސް ވަނީ ހާމަކުރައްވާފައެވެ.

މީގެއިތުރުން އެމްޑީޕީގެ މެނިފެސްޓޯގައި މަތީ ތައުލީމުގެ ދާއިރާއިން ހުރި ބައެއް ކަންކަމަށް ބަލާލާއިރު ތައުލީމާއި ތަމްރީނުގެ ދާއިރާއަކީ ރާއްޖެ އާއި ރާއްޖެއިން ބޭރުން މީހުން ބަލައިގަންނަ ދާއިރާއަކަށް ހެދުމާއި، ޓޫރިޒަމް ސިނާއަތުގައި ދިވެހި މަސައްކަތްތެރިން އިސް ސަފަށް ގެންދިއުމަށް ބޭނުންވާ ހުނަރާއި ތައުލީމު ފޯރުކޮށްދިނުމާއި، ދުނިޔޭގެ ނަން މަޝްހޫރު ހޮސްޕިޓަލިޓީ ސްކޫލެއްގެ ކެމްޕަސް ރާއްޖޭގައި ގާއިމްކުރުން ހިމެނެއެވެ. މީގެއިތުރުން ހިލޭ ޑިގްރީ ޕްރޮގްރާމް ފުޅާކޮށް ސެޓްފިކެޓް 1 އިން ފެށިގެން ޑިގްރީއާ ހަމައަށް ހިލޭ ކިޔެވުމާއި، ރާއްޖެއަކީ އޯޝަން-ބޭސްޑް ސައިންސްގެ ދާއިރާއިން ދިރާސާކުރުމަށް މަގުބޫލު ގައުމަކަށް ހެދުމަށް ވަނީ ހިމަނާފައެވެ.