މިފަހަރުގެ ރިޔާސީ އިންތިޚާބުން ފެންނަ އެއް މަންޒަރަކީ، ރާއްޖެ ޑިމޮކްރަސީއަށް ފައްކާވަމުން އަންނަ މަންޒަރުކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރިޔާސީ އިންތިޚާބުގެ ކެމްޕޭންގެ ތެރެއިން، ގދ ގައްދޫގައި މިރޭ ބޭއްވި ޖަލްސާަގައި ވާހަކަފުޅު ދައްކަވަމުންނެވެ. މިގޮތުން ރައީސުލްޖުމްހޫރިއްޔާ ވަނީ، ކުރީގެ އިންތިޚާބުތަކާއި މިއިންތިޚާބުން ފެންނަ ތަފާތުތަކުގެ މައްޗަށް ބައްލަވާލައްވާފައެވެ.

ރައީސުލްޖުމްހޫރިއްޔާ ވިދާޅުވީ، 2008 ވަނަ އަހަރާއި 2013 ވަނަ އަހަރާއި، 2018 ވަނަ އަހަރު އިންތިޚާބުގައި ނުކުތީ އޭރު ވެރިކަމުގެ ހުރިމީހާ ބަދަލުކުރުމަށް ކަމަށެވެ. އަދި އެކަމުގައި އޭރު އިދިކޮޅު ހުރިހާ ފަރާތްތައް އެއްގަލަކަށް އެރިކަންވެސް ރައީސް ފާހަގަކުރެއްވިއެވެ. ރައީސް ޞާލިޙް ވިދާޅުވީ، މިއަހަރު އެމަނިކުފާނަށް ފެނިވަޑައިގަންނަވާ ތަފާތަކީ، ވެރިކަމުގައި ހުރި މީހާ ގޯސްވެގެން ނޫޅޭ މަންޒަރުކަމަށެވެ. އަދި މިއަދު ލީޑަރުން މަސައްކަތް ކުރައްވަމުން އެގެންދަވަނީ އެބޭފުޅަކަށް ވެރިކަން ހޯދުމަށް ކަމުގައިވެސް ރައީސް ވިދާޅުވިއެވެ.

ރިޔާސީ އިންތިޚާބަށް މިފަހަރު، 5 ޕާޓީއެއްގެ ރިޔާސީ ކެންޑިޑޭޓުންނާއި މިނިވަން 3 ކެންޑިޑޭޓުން ވަނީ ކުރިމަތިލާފައެވެ. 

ރައީސުލްޖުމްހޫރިއްޔާގެ ވާހަކަފުޅުގައި ވަނީ، ކުރީގެ ދައުރުތަކާއި މިދައުރުގައި ފެނިގެން ދިޔަ ތަފާތުތަކުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ.