ގދ. ރަތަފަންދޫއަށް ދިމާވެފައިވާ ބޯހިޔާވަހިކަމުގެ ދަތިކަމަށް ހޯދައިދެއްވާނެ ހައްލަކީ ރަތަފަންދޫއާ ދާދިގާތުގައި އޮތް ކެރައްދޫ، ރަތަފަންދޫގެ ބައެއްގެ ގޮތުގައި ހަމަޖައްސައި އެދެރަށް ގުޅާކުން ކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ހުވަދުއަތޮޅުގެ ރަށްރަށަށް މިހާރު  ކުރައްވަމުން ގެންދަވާ ކެމްޕޭން ދަތުރުފުޅުގައި މިއަދު ހަވީރު، އެރަށަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރަތަފަންދޫ ރައްޔިތުންނާއި ކައުންސިލުންވެެސް ފާހަގަކުރާ އެންމެ ބޮޑު ދަތިކަމަކީ، އެރަށުގެ ބިންފުރިފައިވުމެވެ. އަދި އެރަށާއި އެއްފަޅެއްގައި ދާދި ގާތުގައި އޮތް ކެރައްދޫއަކީ ގުދުރަތީ ބިންކަމުގައިވުމުން ދެރަށް ގުޅާލުމަކީ، ރަތަފަންދޫގެ ރައްޔިތުންގެ ވަރަށް ބޮޑު ހުވަފެނެކެވެ. ރައީސުލްޖުމްހޫރިއްޔާ ވަނީ، ދެވަނަ ދައުރަކަށް އެމަނިކުފާނު އިންތިޚާބުވެވަޑަިއގެންފިނަމަ ރަތަފަންދޫގެ ރައްޔިތުން އެދޭ ގޮތަށް އެކަން ކޮށްދޭނެ ކަމަށް ވަޢުދުވެވަޑައިގެންފައެވެ. މީގެ އިތުރުން އެމަނިކުފާނު ރަތަފަންދޫގެ ތަރައްޤީއަށް ކޮށްދެއްވުމަށް ހުށައެޅުއްވި ކަންކަމުގެ ތެރޭގައި، އެރަށުގެ ބޮޑެތި މަގުތައް ތާރުއަޅައި ޒަަމާނީ ފެންވަރަށް ތަރައްޤީކުރުމާއި، އައު ސިއްޙީމަރުކަޒެއް ބިނާކުރުމާއި، ސްކޫލުގެ މަލްޓި ޕަރޕަސް ހޯލު އެޅުމާއި، ޒުވާނުންގެ މަރުކަޒެއް އެޅުން ހިމެނެއެވެ.

ކެމްޕޭނުގައި ރައީސް ޞާލިޙް ރަތަފަންދޫއަށް ވަޑައިގެންނެވުމުން އެރަށުގެ ރައްޔިތުންގެ ފަރާތުން ރައީސުލްޖުމްހޫރިއްޔާއަށް ވަނީ ހޫނު މަރުޙަބާއެއް ދަންނަވާފައެވެ.