ރާއްޖޭގައި މަސައްކަތް ކުރަމުން އަންނަ ބިދޭސީ މަސައްކަތްތެރިންނާއި ގުޅޭ އެކިއެކި ފީ ތަކާއި ޖޫރިމަނާތަކަށް ޖުމްލަ 636 މިލިއަނަށް ވުރެން ގިނަ ރުފިޔާ ދައުލަތަށް ލިބެން ޖެހޭ ކަމަށް، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އިން މިއަދު ހާމަކޮށްފިއެވެ.

އެ ވުޒާރާއިން ހާމަކުރި ހިސާބުތައް ބުނާގޮތުން، މިހާތަނަށް ނުލިބި ހުރި ފައިސާގެ ސީދާ އަދަދަކީ 636،534،736ރ. (ހަސަތޭކަ ތިރީސް ހަ މިލިއަން ފަސްސަތޭކަ ތިރީސް ހަތަރު ހާސް ހަތް ސަތޭކަ ތިރީސް ހަ ރުފިޔާ) އެވެ.

މީގެ ތެރޭގައި ހިމެނެނީ ވާރކް ޕާމިޓް ފީގެ ގޮތުގައި ހިމެނޭ 573،840،450ރ. އާއި ކޯޓާ ފީގެ ގޮތުގައި ހިމެނޭ 96،550،286ރ. އާއި ކެންސަލޭޝަން ޖޫރިމަނާގެ ގޮތުގައި ހިމެނޭ 2،144،000ރ. އެވެ.

މި ފައިސާއަކީ ބިދޭސީންގެ އެމްޕްލޯޔަރުން ނުވަތަ އެ ފަރާތްތަކަށް ވަޒީފާ ދިން ފަރާތްތަކުން ދައުލަތަށް ދައްކަން ޖެހޭ ފައިސާއެވެ. އެގޮތުން ވާރކް ޕާމިޓް ފީގެ ގޮތުގައި ކޮންމެ ބިދޭސީ މަސައްކަތްތެރިއަކަށް މަހަކަށް 350ރ. ދައްކަން ޖެހެއެވެ. އަދި ކޯޓާ ފީގެ ގޮތުގައި އަހަރަކު ކޮންމެ ބިދޭސީއަކަށް އަހަރަކަށް 2،000ރ. ދައްކަން ޖެހެއެވެ.

ގަވާއިދާއި ހިލާފަށް އުޅެމުންދާ ބިދޭސީންގެ މައްސަލަ ހައްލު ކުރުމުގެ ގޮތުން، ބިދޭސީ މަސައްކަތްތެރިންނާ ގުޅިގެން ދައުލަތަށް ކޮންމެ މަހަކު ދައްކަންޖެހޭ ވާރކް ޕާމިޓް ފީ، ކޯޓާ ފީ އަދި ޖޫރިމަނާގެ އަދަދު 100،000ރ. (އެއް ލައްކަ ރުފިޔާ) އަށް ވުރެން އިތުރުވާ ފަރާތްތަކުގެ ނަންތައް ވެސް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އިން ވަނީ ބުދަ ދުވަހު ހާމަކޮށްފައެވެ. މިނިސްޓްރީ ހާމަ ކުރި ލިސްޓުގައި  ކުންފުނިތަކާއި އަމިއްލަ ފަރުދުން ހިމެނޭހެން 1026 ފަރާތެއްގެ ނަން ހިމެނެއެވެ.

މިނިސްޓްރީއިން ކުރި އިއުލާނުގައި، އެ ފައިސާ އޯގަސްޓް 12، 2024 ގެ ކުރިން ދައުލަތަށް ދެއްކުމަށް އަންގާފައިވެއެވެ. އަދި މި މުއްދަތުގެ ތެރޭގައި މި ފައިސާ ދައްކާ ޚަލާސްނުކޮށްފިނަމަ، އެފަރާތްތަކަށް އެކްސްޕެޓް ސިސްޓަމް މެދުވެރިކޮށް އައު ހުއްދަ ދިނުން ހުއްޓާލެވޭނެކަންވެސް އަންގާފައިވެއެވެ.