ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ މިދިޔަ އަހަރުގެ ފަހު ކުއާޓާގެ ރިޕޯޓު ބުނާ ގޮތުން، ސަރުކާރު ހިއްސާވާ ކުންފުނިތަކަށް ޖުމްލަ ދެ ބިލިއަނަށް ވުރެ ގިނަ ރުފިޔާގެ ގެއްލުން  ވެއްޖެއެވެ.

އެގޮތުން 2023 ވަނަ އަހަރުގެ ފަހު ކުއާޓާގައި އެ ކުންފުނިތަކަށް ޖުމްލަ އާމްދަނީގެ ގޮތުގައި 13.27 ބިލިއަން ރުފިޔާ ލިބިފައިވާ އިރު، ކުންފުނިތަކުގެ ޖުމްލަ ގެއްލުމުގެ އަދަދު ހުރީ 2.27 ބިލިއަން ރުފިޔާގައި ކަމަށް އެ ރިޕޯޓުގައި ވެއެވެ.

މި ކުންފުނިތަކުގެ އާމްދަނީގެ ބޮޑުބައެއް މުވައްޒަފުންގެ މުސާރަ އާއި އިނާޔަތްތަކަށް ހޭދަކޮށްފައިވާ އިރު، މިދިޔަ އަހަރު އެކަނި ވެސް މި ކުންފުނިތަކަށް 3،503 މުވައްޒަފުން އިތުރުކޮށްފައި ވެއެވެ. އަދި އެ ރިޕޯޓުގައި ވާ ގޮތުން، މުވައްޒަފުން އެންމެ ބޮޑަށް އިތުރުކޮށްފައިވަނީ ފެނަކަ އާއި އެޗްޑީސީ އާއި ސްޓެލްކޯ އަދި އެމްޓީސީސީ އަށެވެ.

އެގޮތުން އެއް އަހަރުގެ ތެރޭގައި ފެނަކައަށް 682 މުވައްޒަފުން، އެމްޓީސީސީ އަށް 734 މުވައްޒަފުން، ސްޓެލްކޯ އަށް 302 މުވައްޒަފުން އަދި އެޗްޑީސީ އަށް 642 މުވައްޒަފުން ވައްދާފައި ވެއެވެ.

އަދި ކުންފުނިތަކުގެ ގެއްލުމަށް ބަލާއިރު ގެއްލުމުގެ އެންމެ ބޮޑު ބައެއް ހިއްސާ ކުރަނީ އެޗްޑީސީއިން ކަމުގައި އެ ރިޕޯޓުގައި ބުނެފައިވެއެވެ. އެގޮތުން މިދިޔަ އަހަރުގެ ފަހު ކުއާޓަރުގައި އެޗްޑީސީ އަށް ލިބުނު ގެއްލުން އުޅެނީ 3.23 ބިލިއަން ރުފިޔާގައެވެ. މި ގެއްލުމުގެ ސަބަބުތަކުގެ ތެރޭގައި، ހުޅުމާލޭގައި ޔޮޓު މެރިނާ އެޅުން ހިސާބުތަކުން އުނި ކުރުމާއި، ހުޅުމާލެ 2 ގެ ޔުޓިލިޓީ ނެޓްވޯކު ގާއިމްކުރަން ސްޓެލްކޯ އިން ލިބެން ޖެހޭ ފައިސާ ނުލިބުމުގެ އިތުރުން، ހިޔާ ފްލެޓުތަކުގެ ކުއްޔާއި ޖޫރިމަނާ ކުޑަކުރުން ހިމެނޭ ކަމަށް ރިޕޯޓުގައި ވަނީ ފާހަގަކޮށްފައެވެ.

އަދި އާމްދަނީގެ ނިސްބަތަށް ބަލާއިރު، މުސާރަ ދިނުމަށް އެންމެ ބޮޑު ހަރަދެއް ކުރަނީ އައްޑޫ އިންޓަނޭޝަނަލް އެއާޕޯޓު (އޭއައިއޭ) އިންނެވެ. އެ ކުންފުންޏަށް މިދިޔަ އަހަރުގެ ފަހު ކުއާޓަރުގައި 3.28 މިލިއަން ރުފިޔާގެ އާމްދަނީއެއް ލިބުނު އިރު، މުވައްޒަފުންގެ މުސާރަ އާއި އިނާޔަތްތަކަށް 11.69 މިލިއަން ރުފިޔާ ހަރަދުކޮށްފައި ވެއެވެ. މިއީ އާމްދަނީގެ ނިސްބަތުން 356 ޕަސަންޓު އިތުރު އަދަދެކެވެ.