ސަރުކާރުގެ މަސް ކުންފުނި، މިފްކޯއިން މަސް ގަންނަ އަގު 20ރ. އިން 15ރ. އަށް ތިރިކުރަން އުޅޭކަމަށް ޚަބަރު ފެތުރޭން ފަށައިފިއެވެ.

މި އަޑު ފެތުރިފައިވާ އިރު، ރައްޔިތުންގެ މަޖިލީހުގެ މާލިއްޔަތު ކޮމެޓީގައި ވެސް އިއްޔެ ވަނީ އެކަމާ މަޝްވަރާކޮށްފައެވެ. އެގޮތުން، ސަރުކާރުގެ އިކޮނޮމިކް ކައުންސިލުން ނިންމައި ރައްޔިތުންގެ މަޖިލީހަށް ހުށަހެޅި ކަރުދާހަކާ ހަވާލާދީ ރައްޔިތުންގެ މަޖިލީހުގެ މާލިއްޔަތު ކޮމިޓީގެ އިއްޔެގެ ބައްދަލުވުމުގައި އެ ކޮމިޓީގެ މެންބަރު އަދި މަޖިލީހުގެ ދިއްގަރު ދާއިރާގެ މެންބަރު އަހުމަދު ނާޒިމު ވިދާޅުވީ ޖުލައި 24 އިން ފެށިގެން، މަސްގަންނަ އަގު މުރާޖައާ ކުރާނެ ކަމަށެވެ. އަދި މިއީ ފިނޭންސް މިނިސްޓަރުގެ ލަފާފުޅު މިކަމުގައި ހިމެނޭ ކަމެއްކަމަށް ވަނީ އެނގިފައެވެ.

މައުލޫމާތު ލިބޭ ގޮތުގައި މިފްކޯއިން މަސް ގަންނަ އަގަށް ބަދަލު ގެނައުމަށް ނިންމާފައިވަނީ މި ފެށޭ ޖުލައި މަހުގެ 1 ވަނަ ދުވަހުން ފެށިގެންނެވެ. މަސް ގަންނަ އަގު ދަށްކޮށްފިނަމަ، ސަރުކާރުން މިފްކޯއަށް ދޭ ސަބްސިޑީ ކުޑަކުރެވޭނެއެވެ. އެގޮތުން 20ރ. އަށް މަސް ގަނެގެން ސަބްސިޑީގެ ގޮތުގައި ސަރުކާރުން 7ރ. މިފްކޯއަށް ދައްކަން ޖެހުނު ނަމަވެސް، މަސް ގަންނަ އަގު ދަށްކޮށްފިނަމަ އެ އަދަދު 2ރ. އަށް ތިރި ކުރެވޭނެއެވެ.

މަސްވެރިންނަށް މިފްކޯއިން ދޭން ޖެހޭ ފައިސާގެ ބޮޑު އަދަދެއް ނުދީ އޮތުމުން، މަސްވެރިން ދޭތެރެ ދޭތެރެއިން މުޒާހަރާ ކުރެއެވެ. މި ނޫހަށް އެނގިފައިވާ ގޮތުގައި މަސްވެރިންނަށް ދޫކުރަންޖެހޭ ފައިސާގެ ތެރެއިން މިހާތަނަށް ދޫކޮށްފައި ނުވާ ފައިސާގެ އަދަދު 50 މިލިއަން ރުފިޔާއަށް އަރައެވެ،