ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ވެރިކަމުގެ މި 5 އަހަރަކީ، ރައްޔިތުންނަށް، މިނިވަންކަން ލިބިގެންދިޔަ 5 އަހަރުކަމުަގައި، ރައްޔިތުންގެ މަޖިލީހުގެ، މާފަންނު ހުޅަނގު ދާއިރާގެ މެމްބަރު މުޙައްމަދު ފަލާޙް ވިދާޅުވެއްޖެއެެވެ.

މެމްބަރު ފަލާޙް މިހެން ވިދާޅުވީ، "ނޫން" އަށް ދެއްވި، ޚާއްޞަ ބަސްދީގަތުމުގައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙާއި، ރާއްޖޭގައި ވެރިކަން ކުރެއްވި އެހެން ބޭފުޅުންނާއި ހުރި ތަފާތުގެ މައްޗަށް ވާހަކަފުޅު ދައްކަވަމުންނެވެ. 

މެމްބަރު ފަލާޙް ވިދާޅުވީ، މިފަސް އަހަރަކީ، ރާއްޖޭގަ ވިޔަފާރިވެރިންނަށްވެސް، ރާއްޖޭގެ ރައްޔިތުންނަށްވެސް ހަމަނޭވާ ލެވިގެން ކަމަކާއި ވިސްނާލައިގެން އެމީހުންގެ އަމިއްލަ ދިރިއުޅުން ބައްޓަން ކުރުމަށް މަސައްކަތެއްކުރަން ލިބުނު 5 އަހަރު ކަމަށެވެ. އަދި ދިވެހިރާއްޖެއަށް ޑިމޮކްރަސީ ގެނައުމަށް ކުރި ދަތުރުގައި، 18 އަހަރެއްހާ ދުވަސް ރައްޔިތުން ވޭތުކުރަން ޖެހުނީ ބިރުވެރިކަމުގެ ތެރޭގައިކަން ފަލާޙް ފާހަގަކުރެއްވިއެވެ.

Advertisement

ފަލާޙް ވިދާޅުވީ، އެހެންވެރިންނާއި ރައީސް ޞާލިޙާއި ތަފާތަކީ، ރައީސް ޞާލިޙަކީ މީހުންނަށް ރައްދުދީ ބަދުބަސްބުނެ އަދި އަނިޔާވެރިވާ ބޭފުޅަކަށް ނުވުން ކަމަށެވެ. އަދި މިވެރިކަމުގެ ކުރީގެ 5 އަހަރު ހިނގައި ދިޔަ ކަންކަންވެސް މެމްބަރު ފަލާޙް ވަނީ ފާހަގަކުރައްވާފައެވެ. މިގޮތުން ކުރީގެ ސަރުކާރުތަކުގައި، ސިޔާސީ މީހުން ހައްޔަރުކޮށް ޖަލަށްލާފައި ވީނަމަވެސް މިހިނގާ 5 އަހަރުގެ ތެރޭގައި ސިޔާސީ ގޮތުން އެއްވެސް މީހަކު ބަންދުކޮށްފައި ނެތްކަންވެސް މެމްބަރު ފަލާޙް ފާހަގަކުރެއްވިއެވެ.

މެމްބަރު ފަލާޙް އިތުރަށް ވިދާޅުވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ މިވެރިކަމުގައި ރައްޔިތުންނަށް ވަރަށް ގިނަ ކަންކަން ކޮށްދެއްވާފައިވާ ކަމަށެވެ. މިގޮތުން ހިލޭ ޑިގްރީ ޕްރޮގްރާމާއި، ރާއްޖޭގެ ރައްޔިތުންނަށް ރައްކާތެރި ނަރުދަމާގެ ނިޒާމާއި ސާފު ބޯފެން ފޯރުކޮށްދެއްވުމަށް މަޝްރޫޢުތައް ހިންގަމުންދާކަން ފަލާޙް ފާހަގަކުރެއްވިއެވެ. އަދި ރާއްޖޭގައި އަމަން އަމާންކަން ޤާއިމް ކުރެއްވުމަށާއި، ޞިއްޙީ ޚިދުމަތް ފުޅާކޮށް ތަރައްޤީކުރުމަށް ކުރައްވާފައިވާ މަސައްކަތްތައްވެސް މެމްބަރު ފަލާޙް ވަނީ ފާހަގަކުރައްވާފައެވެ. 

މެމްބަރު ފަލާޙް އިތުރަށް ވިދާޅުވީ، ރާއްޖޭގެ ރައްޔިތުންނަށް ވީ ވަޢުދު ރަނުން ރަނަށް ފުއްދައި ދެއްވި ހަމައެކަނި ރައީސަކީ ހަމައެކަނި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކަމަށެވެ. އަދި ރައީސް އިބްރާހީމް މުހައްމަދު ޞާލިޙްގެ ވެރިކަމުގެ ދެވަނަ ދައުރެއް ވެގެންދާނީ އުޖާލާ ދައުަރަކަށް ކަމުގައިވެސް މެމްބަރު ފަލާޙް ވަނީ ވިދާޅުވެފައެވެ.