މިދިޔަ ސަތޭކަ ވަރަކަށް އަހަރު ތެރޭގައި ދުނިޔެއަށް އައި އެންމެ ބޮޑު ލޮޅުން ކަމުގައިވާ، ކޮވިޑް-19 ގެ އާލަމީ ވަބާ މުޅި ދުނިޔެއަށް ކުރިމަތިވެ، ޤައުމުތަކުގައި ސިއްޙީ ކުއްލި ނުރައްކަލުގެ ހާލަތު އިޢުލާންކޮށް، ދުނިޔޭގެ އާބާދި ފުރާނައިގެ ބިރުވެރިކަމެއްގެ ތެރޭގައި އޮވެ، ދުނިޔޭގެ އިޤްތިޞާދު ހުއްޓުމަކަށް އައިސްފައި އޮތް ދުވަސްތަކެއް އަޅުގަނޑުމެންނާއި ކުރިމަތިވިއެވެ. މުޅި ދުނިޔެއާއި އަދި ރާއްޖޭގެ ހާލަތު ވެސް މިފަދަ ފައްތަރެއްގައި އޮތް ނާޒުކު ވަގުތުގައި ވެސް، ރާއްޖޭގެ ތަރައްޤީގެ މުހިންމު މަޝްރޫޢުތަކަށް ހުއްޓުމެއް އަޔަނުދީ އަދި އިޤްތިޞާދަށް ލޮޅުމެއް އެރިޔަ ނުދީ، ރާއްޖޭގެ ހުރިހާ ރަށެއްގައި ތަރައްޤީގެ މުހިންމު މަޝްރޫޢުތައް ރައީސުލް ޖުމްހޫރިއްޔާ އިބްރާޙިމް މުޙައްމަދު ޞާލިޙް މެދުނުކެނޑި ހިންގެވީ، ރައީސުލް ޖުމްހޫރިއްޔާއަކީ ހަރުދަނާ ލީޑަރެއް ކަމުގައި ވާތީކަމަށް، ކެނދިކޮޅުދޫ ދާއިރާގެ އިއްޒަތްތެރި މެންބަރ އަޙްމަދު ޢީސާ ވިދާޅުވެއްޖެއެވެ. މެންބަރ އީސަ މިހެން ވިދާޅުވީ، "ނޫން" އަށް ދެއްވި ޙާއްސަ އިންޓަވިއުއެއްގައި، ރައީސުލް ޖުމްހޫރިއްޔާ އިބްރާޙިމް މުޙައްމަދު ޞާލިޙްގެ މި ދައުރު ސިފަކުރައްވަމުންނެވެ.

ރައީސުލް ޖުމްހޫރިއްޔާގެ ފުރަތަމަ ފަސް އަހަރު އިތުރަށް ސިފަ ކުރައްވަމުން މެންބަރ އީސަ ވިދާޅުވީ، ރައީސް ޞާލިޙްގެ މި ވެރިކަމަކީ ހަރުދަނާ ވެރިކަމެއް ކަމަށާއި، އަދި ރައީސް ޞާލިޙްއަކީ ވަރަށް ގިނަ މަސައްކަތްތަކެއް، ވަރަށް ތަރުތީބުކޮށް މުޅި ރާއްޖޭގައި ހިންގެވި، އަދި ހިންގަވަމުން ގެންދަވާ ވެރިއެއް ކަމަށެވެ.

އެހެން ރައީސުންނާއި ރައީސް ޞާލިޙް އާއި ހުރި ތަފާތު ސިފަ ކުރައްވަމުން މެންބަރ އީސަ ވިދާޅުވީ، ރައީސް މައުމޫންގެ ވެރިކަމުން ފެށިގެން މި އައި ފަސް ވެރިކަމުގެ ތެރޭގައި، ޤައުމު ހަލަބޮލިވިއަ ނުދީ އެންމެ ރަގަޅަށް ހިފެހެއްޓެވި ވެރިއަކީ ރައީސް ޞާލިޙް ކަމަށެވެ.

އަދި ހަމައެއާއި އެކު، ސިޔާސީ ދައުވާތައް އުފުލުމާއި، ސިޔާސީ މަންފާތަކަށްޓަކައި މީހުން ހައްޔަރު ކުރުމާއި، ދައުލަތުގެ ބާރުތަކުގެ ތެރެއަށް ރައީސް ޞާލިޙް ނުފޫޒު ނުފޯރުވުމީ، އެހެން ރައީސުންނާއި، ރައީސް ޞާލިޙް ތަފާތުވާ އަނެއް މުހިންމު ސަބަބުކަމުގައި އީސަ ފާހަގަކުރެއްވިއެވެ.

މީގެ އިތުރުން ރައީސް އިބްރާޙިމް މުޙައްމަދު ޞާލިޙްއަކީ ދައްކަވާ ވާހަކައަށް ވުރެން ހަރުދަނާ އަމަލުތައް ގިނަ ވެރިއެއް ކަމަށާއި، އަދި އެބޭފުޅާއަކީ މަޑުމައިތިރި، ކެތްތެރި، އޯގާތެރި، ހަރުދަނާ ލީޑަރެއްގެ ގޮތުގައި ސިފަ ކުރެއްވެވިއެވެ.

އިތުރު ދައުރަކަށް ރައީސް ޞާލިޙް ހޮއްވަވަން ޖެހޭ ސަބަބުތައް ވިދާޅުވަމުން، ކެނދިކޮޅުދޫ ދާއިރާގެ އިއްޒަތްތެރި މެންބަރ ވިދާޅުވީ، ރައީސް ޞާލިޙްއަކީ ރަށްރަށުގެ އާބާދީއަށް ނުބައްލަވާ ރައްޔިތުންގެ އަސާސީ ޚިދުމަތްތައް ފުއްދަވާ ބޭފުޅެއް ކަމަށެވެ.

މިކަމަށް މިސާލު ޖައްސަވަމުން ވިދާޅުވީ، މީގެ ކުރިން ނ. ހެނބަދޫގެ ގޭގޭގައި ފެންވަރަން ބޭނުންކުރާ ފެނަށް ވުރެން މޫދު ލޮނު ބޭނުން ކުރުން މާ ހިތަށް ފަސޭހަވާނެ ކަމަށާއި، ސަބަބަކީ ވަޅުގެ ފެން ލޮނު ވެފައި ނުބައި ވަސް ދުވިޔަސް މޫދު ލޮނުގައި ނުބައި ވަސް ނުދުވާނެތީއެވެ. ނަމަވެސް މި ދައުރުގައި ރައީސް ޞާލިޙް ވަޑައިގެން އެ ރަށުގެ ފެނުގެ ނިޒާމު އަޅުއްވާދެއްވާ، އެ ރަށުގެ ރައްޔިތުން ގައިން ތާހިރުވެވޭނެ މަގު ފަހިކޮށްދީފައިވާކަމަށް އީސަ ވިދާޅުވިއެވެ.

އިންޓަވިއު ނިންމަވާލެއްވުމުގެ ކުރިން މެންބަރ އީސަ ވިދާޅުވީ، ރައްޔިތުންނަށް އިޙްލާސްތެރިކަމާއިއެކު ޚިދުމަތްކުރެއްވި ވެރިއަކަށް އެއަށްވުރެން ފުޅާކޮށް އެ ޚިދުމަތްކުރަން ފުރުސަތު ދެވެން އޮއްވައި، އެ ފުރުސަތު ހޯދައިދިނުން މުހިންމު ކަމަށެވެ.

އަދި ކުރިއަށް އޮތް ރިޔާސީ އިންތިހާބާ ގުޅިގެން ވިދާޅުވީ، " އަޅުގަނޑު ޤަބޫލުކުރާ ގޮތުގައި ދިވެހި ރާއްޖޭގެ ތާރީޙުގައި، މި ޤާނޫނު އަސާސީގެ ދަށުން، ދެވަނަ ދައުރަކަށް ފުރަތަމަ ވެރިކަމަށް އަންނަ ރައީސުލް ޖުމްހޫރިއްޔާގެ ގޮތުގައި މިއަންނަ ނޮވެމްބަރ 11 ގައި އިބްރާޙިމް މުޙައްމަދު ޞާލިޙް ހުވާ ކުރާނެ" ކަމަށެވެ.