މަސްވެރިންގެ އަތުން މަސް ގަތުމަށްފަހު ސަރުކާރުން ދޭން ޖެހިފައިވާ ފައިސާގެ ތެރެއިން 70 މިލިއަން ރުފިޔާ ދޫކޮށްފައިވާކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ހާމަކޮށްފިއެވެ.

އެ މިނިސްޓްރީއިން ނެރުނު ބަޔާނެއްގައި ވާގޮތުން، ބުދަ ދުވަހުގެ ރޭގެ ނިޔަލަށް މިފްކޯއިން މަސްވެރިންނަށް 70 މިލިއަން ރުފިޔާ ޖަމާކޮށްދީފައިވެއެވެ. އަދި ބާކީ 30 މިލިއަން މި އަންނަ ހޯމަ ދުވަހުގެ ނިޔަލަށް ޖަމާކޮށްދޭނެކަމަށް ވެސް އެ މިނިސްޓްރީއިން ބުނެފައިވެއެވެ.

މަސްވެރިންނަށް ދޭންޖެހޭ ފައިސާ ނުލިބިގެން ކޫއްޑޫ މަސްވެރިންވަނީ މިދިޔަ ހަފްތާގައި މުޒާހަރާކޮށް، ކޫއްޑޫ މަސްފެކްޓަރީ ހުއްޓުމަކަށް ގެނަސްފައެވެ. މިކަމާ ގުޅިގެން މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހްމަދު ޝިޔާމް ވަނީ ކޫއްޑޫއަށް ވަޑައިގެން މަސްވެރިންނާ ބައްދަލުކޮށްފައެވެ. އަދި ސަރުކާރުން އެ ފައިސާ ވަރަށް އަވަހަށް ހަމަޖައްސައިދޭނެކަމަށާއި، މަސްވެރިން އަނބުރާ މަހަށް ފުރުމަށް މިނިސްޓަރ ވަނީ އެދިވަޑައިގެންފައެވެ.

ކޫއްޑޫ މަސް ފެކްޓަރީގެ މަސައްކަތް މިދިޔަ ބުދަ ދުވަހު އަނބުރާ ރުޖޫއަކޮށްފައިވާއިރު، މިނިސްޓަރުގެ މި ކުއްލި ދަތުރުފުޅާ ގުޅިގެން ކޫއްޑޫގެ މަސްވެރިންގެ ފަރާތުން ލިބުނު އެއްބާރުލެއްވުމަށް މިނިސްޓްރީން ވަނީ މަރުހަބާ ކިޔާފައެވެ.

މިނިސްޓްރީން ނެރުނު ބަޔާނުގައި އިތުރަށް ފާހަގަކޮށްފައިވާ ގޮތުގައި، މަސްވެރިންގެ ކަންބޮޑުވުންތައް ހައްލުކޮށް މަސްވެރިކަމުގެ ސިނާއަތު ތަރައްގީކޮށް މަސްވެރިކަމުން ލިބޭ އާމްދަނީ އިތުރުކޮށް މަސްވެރި އާއިލާތަކުގެ ތަނަވަސްކަން އިތުރުކުރުމަކީ ސަރުކާރުގެ އެންމެ ބޮޑު އެއް އަމާޒެވެ. އަދި މަސްއޮޑިފަހަރަށް ދޭންޖެހޭ ފައިސާ ވީ އެންމެ އަވަހަށް ދޫކުރުމުގެ އިންތިޒާމް ހަމަޖައްސައި ދިނުމުގެ މަސައްކަތް ވެސް ކުރާނެ ކަމަށް މިނިސްޓްރީއިން ނެރުނު ބަޔާނުގައިވެއެވެ.

ސަރުކާރުގެ އަމާޒަކީ މިފްކޯއަށް ކިރާ މަހުގެ އަގަށް ވާ ފައިސާ 48 ގަޑިއިރުގެ ތެރޭގައި މަސްވެރިންނަށް ދޫކުރުމުގެ ކަންކަން މި ދައުރުގެ ކުރީކޮޅު ފެށުމެވެ. އަދި އެ އަމާޒާއެއްގޮތަށް އެކަން ކުރިޔަށް ގެންދަވާނެކަމުގެ ޔަގީންކަން ދެއްވައި އެ ވައުދު ރައީސް ވަނީ މި ފަހުން ވެސް ތަކުރާރު ކުރައްވައިފައެވެ.