ހުޅުމާލޭގެ މުނިސިޕަލް ޚިދުމަތްތައް އެޗްޑީސީން ސިޓީކައުންސިލްގެ ދަށަށް ބަދަލުވެގެންދާއިރު، ސިޓީ ކައުންސިލްގެ މުވައްޒަފުންނަށް، މިހާރު ލިބޭ މުސާރަ އާއި އިނާޔަތްތައް އުނިނުވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ދަށަށް ބަދަލުކުރުމާއި ގުޅޭ ގޮތުން، މީގެ ކުރިން ދެއްކެވި ވާހަކަފުޅުތަކުގައިވެސް ރައީސް ވަނީ އެކަން ފާހަގަކުރައްވާފައެވެ. އެހެން ނަމަވެސް އެމަނިކުފާނު އެކްސްގައި ކުރެއްވި ޕޯސްޓްގައި ވިދާޅުވީ، ހުޅުމާލޭގެ މުނިސިޕަލް ހިދުމަތްތައް އެޗްޑީސީން އެމްސީސީއަށް ބަދަލުކުރުމާ ގުޅިގެން އެޗްޑީސީގެ ބައެއް މުވައްޒަފުންގެ ކަންބޮޑުވުންތައް ވަނީ ލިބިވަޑައިގެންފައި ކަމަށެވެ.

އަދި ކުރިޔަށް އޮތް އަހަރުގެ ތެރޭގައި މުވައްޒަފަކަށް މުސާރައާއި، އިންޝުއަރެންސް، ނުވަތަ އެނޫންވެސް އިނާޔަތްތަކެއް، މިހާރު ލިބޭ މިވަރަކަށް ވުރެ ކުޑަނުވާނެ ކަމަށާއި، އަދި މުސާރައާއި އިނާޔަތްތައް ކުޑަ ވަޒީފާއެއް ޤަބޫލުކުރަން މަޖުބޫރު ނުކުރާނެ ކަމުގެ ފުރިހަމަ ޔަޤިންކަންވެސް ދެއްވާކަމުގައި ރައީސް، ޑރ. މުޙައްމަދު މުޢިއްޒު ވިދާޅުވިއެވެ.

މާލޭ ސިޓީކައުންސިލާއި އެޗްޑީސީގެ މުވައްޒަފުންގެ މެދުގައި މުސާރައިގެ ތަފާތުތައް ހުރުމާއިއެކު، އާބަންކޯގައި ވަޒީފާ އަދާކުރާ މީހާކާއި ހަމަ އެ މަޤާމުގައި ސިޓީ ކައުންސިލްގައި ވަޒީފާ އަދާކުރާ މީހެެއްގެ މުސާރައިގައި ވަރަށް ބޮޑު ފަރަޤެއް އެބަހުއްޓެވެ. އެހެންވެ އާބަންކޯގެ މުވައްޒަފުންގެ ކަންބޮޑުވުމަކީ، ވަޒީފާ ބަދަލުވެގެން ދާއިރު، އެމީހުންގެ މަޤާމުތަކުގެ މުސާރަ އާއި ޢިނާޔަތްތައް މާލެ ސިޓީ ކައުންސިލްގައި އޮތް އޮނިގަނޑަށް ފައްތައިލުމުން ލިބޭ މުސާރަ ކުޑަވެގެން ހިނގައިދާނެ ކަމުގެ ކަންބޮޑުވުމެވެ. އެހެން ނަމަވެސް އެކަމާއި މެދު ސަރުކާރުން ވިސްނައި އެކަމަށް އެކަށިގެންވާ ނިޒާމެއް ޤާއިމްކޮށް ތަންފީޒް ކުރައްވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ހުޅުމާލޭގެ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ދަށަށް ބަދަލުކުރުމުގެ މަސައްކަތް 1 ޖެނުއަރީން ފެށިގެން ސަރުކާރުން ވަނީ ފައްޓަވާފައެވެ. އަދި ސަރުކާރުން އަމާޒި ހިފާފައި ވަނީ ޖެނުއަރީ މަސް ނިމުމުގެ ކުރިން ހުޅުމާލޭގެ ހުރިހާ މުނިސިޕަލް ޚިދުމަތްތަކާއި ބިންތަކާއި މެޝިނަރީޒްއާ މުވައްޒަފުން މާލޭގެ ސިޓީ ކައުންސިލްގެ ދަށަށް ބަދަލުކޮށް ނިންމުމަށެވެ.