ބިންހިއްކުމުގެ މަޝްރޫޢުތައްކަށް މާލެ އަތޮޅުގެ އެތެރެވަރިން ވެލި ނަގަމުންދާތީ އެންވެރިކަން ހަލާކުވެއްޖެކަމަށް ބުނެ ބޮޑުކަންނެލި މަސްވެރިންގެ ޔޫނިއަނުން ކަންބޮޑުވުން ފާޅުކޮށްފިއެވެ.

އެ ޔޫނިއަންގެ އެކްސް ހޭންޑަލްގައި ފިޝަރީޒް މިނިސްޓަރ ޝިޔާމް އާއި، އެންވަޔަރަމަންޓް ޕްރޮޓެކްޝަން އޭޖެންސީ، ޓެގްކޮށް ކޮށްފައިވާ ޕޯސްޓްގައި ބުނެފައި ވަނީ، ކަންނެލިމަސްވެރިން އެންމެ ރަނގަޅަށް އެންވެރިކަން ކުރަމުން އަންނަ އިހުރު ވައްބިންފަރު ކައިރިން ކޮންމެދުވަހަކު މަހާޖައްރާފު ވެލިނަގަމުން ދާތީ އެންވެރިކަން ހަލާކުވެއްޖެ ކަމަށާއި، މާލެ އަތޮޅުތެރެއިން ވެލިނެގުން މިއަދުން މިއަދަށް ހުއްޓުވުމަށް ކަމާއިބޭ އެންމެހާ ފަރާތްތަކަށް ގޮވާލާ ކަމަށެވެ.

މާލެ އަތޮޅު ވައްބިންފަރާއި އިހުރު، ކައިރިން ވެލި ނަގަމުން ދަނީ، އުތުރު ތިލަފަޅާއި، ގިރާވަރުފަޅަށް އިތުރުކުރާ ބިމާއި، ރަސްމާލޭގެ ބިން ހިއްކުމަށް ކަމަށް އެނގިފައިވެއެވެ.

ބިންހިއްކުމަށް މާލެ އަތޮޅު އެތެރެވަރިން ތެރެއިން ޑްރެޖަރުން ވަރަށް ގިނަ އަދަދަކަށް ވެލި ނަގަމުންދާތީ، އެތެރެވަރި ކިލުންވެ ފަރުފަރާ ހާހަލުގެ މައްޗަށް ކިސަޑާއި ވެލި އެޅި ގުދުރަތީ ފަރުތައް ހަލާކުވަމުންދާނީ، އެންވެރިކަންވެސް ދަނީ ހަލާކުވަމުންނެވެ.

ބިން ހިއްކުމުގެމަޝްރޫޢުތަކަކީ، ތިމާވެށީގެ ގޮތުން ބަލާއިރު ގެއްލުން ބޮޑު މަޝްރޫޢުތަކަކަށްވެފައި، އެކަމުގެ ސަބަބުން މަސްވެރިކަމާއި ފަތުރުވެރިކަމުގެ ސިނާޢަތަށްވެސް ނޭދެވޭ އަސަރުތައް ކުރަމުން އަންނާތީ ތިމާވެށި ހިމާޔަތްކުރުމަށް މަސައްކަތް ކުރާ ފަރާތްތަކުންވެސް އަންނަނީ، ބިންހިއްކައިގެން ކުރިޔަށްގެންދެވޭ ތަރައްޤީގެ މަޝްރޫޢުތަކާއި ދެކޮޅު ހަދަމުންނެވެ.

މާލެ ސަރަހައްދުގައި ބިންހިއްކުމުގެ ބޮޑު ހަތަރު މަޝްރޫޢުއެއް ދަނީ ހިނގަމުންނެވެ. އެއީ ހުޅުމާލެ 3 ވަނަ ފިޔަވަހީގެ ބިން ހިއްކުމާއި، ގުޅިފަޅާއި، އުތުރުތިލަފަޅާއި ގިރާވަރު ފަޅާއި، ފުށި ދިއްގަރުފަޅުގެ ބިން ހިއްކުމުގެ މަސައްކަތެވެ.