Advertisement
ނައިޖީރިއާ ފުލުހުން --
އެމެރިކާ އެމްބަސީގެ މުވައްޒަފުން ދަތުރުކުރި ޤާފިލާއަކަށް ހަމަލާދީ 4 މީހުން މަރާލައި، އިތުރު 3 މީހުން ވަގަށް ނަގައިފި
ނައިޖީރިއާގައި ހުންނަ އެމެރިކާގެ އެމްބަސީގެ މުވައްޒަފުން ދަތުރުކުރި ޤާފިލާއަކަށް ދިން ހަމަލާގައި 4 މީހުން މަރުވެއްޖެއެވެ.
މަރުވި މީހުންގެ ތެރޭގައި ހިމެނެނީ އެމެރިކާގެ އެމްބަސީގެ ދެ މުވައްޒަފަކާއި ދެ ފުލުހުންނެވެ.
މީގެ އިތުރުން ހަމަލާދިން މީހުން އިތުރު 3 މީހަކު ވަގަށް ނަގައިގެން ގެންގޮސްފައިވާކަމަށްވެސް ނައިޖީރިއާގެ ފުލުހުން ވަނީ ބުނެފައެވެ. މިހާދިސާ ހިނގާފައި ވަނީ ނައިޖީރިއާގެ އަނަމްބަރާ ސްޓޭޓްގައެވެ.
Advertisement
އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން ނެރުއްވި ބަޔާނުގައި ވިދާޅުވީ، އެމެރިކާގެ މިޝަން އާއި ނައިޖީރިއާގެ ސަފީރުން މަސައްކަތް ކުރަމުން ދަނީ ވަގަށް ނަގާފައިވާ މީހުން ތިބި ތަނާއި ހާލަތު ދެނެގަތުމަށް ކަމަށެވެ. އޭނާ ވިދާޅުވި ގޮތުގައި އެ ގާފިލާގައި ޖުމްލަ ނުވަ ނައިޖީރިއާ މީހުން ތިއްބެވެ.
އެ ގާފިލާގައި ތިބީ ނައިޖީރިއާގައި ހުންނަ އެމެރިކާ މިޝަންގެ ފަސް މުވައްޒަފަކާއި ނައިޖީރިއާ ޕޮލިސް ފޯސްގެ ހަތަރު މެމްބަރުންނެވެ. ބްލިންކެން ވިދާޅުވި ގޮތުގައި އެ މީހުން ދަތުރު ކުރަމުން ދިޔައީ އަނަމްބްރާ ސްޓޭޓުގައި އެމެރިކާގެ އެހީގައި ކުރިއަށް ގެންދާ ފްލަޑް ރެސްޕޮންސް ޕްރޮޖެކްޓަކަށް އެމެރިކަން މިޝަންގެ މީހުން ކުރަން ރާވާފައިވާ ދަތުރެއްގެ ކުރިން އެޑްވާންސް ޓީމުގެ ގޮތުގައެވެ.
މިހަމަލާ ދީފައިވަނީ، ނައިޖީރިއާ ސަރުކާރުގެ ދަށުން ވަކިވެގަނެ އަމިއްލަ މިނިވަން ޤައުމެއް އުފެއްދުމަށް މަސައްކަތް ކުރަމުން އަންނަ އިންޑިޖީނަސް ޕީޕަލް އޮފް ބިއަފްރާއަށް ނިސްބަތްވާ ހަނގުރާމަވެރިންކަމުގައި ނައިޖީރިއާގެ ފުލުހުން ތުހުމަތުކޮށްފައިވެއެވެ.އެހެންނަމަވެސް އެޖަމާޢަތުން އެކަން ދޮގު ކުރެއެވެ.
