މިއަހަރުގެ މަސްވެރިންގެ ދުވަހާއި ގުުޅުވައިގެން، މިނިސްޓްރީ އޮފް ފިޝަރީޒް އެންޑް އޯޝަން ރިސޯސްއިން އިންތިޒާމްކޮށްގެން ބޭއްވި، މަސްވެރިންގެ ގުންޒަރުގެ ބައިވެރިންނާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައްދަލުކުރައްވައިފިއެވެ. މިބައްދަލުކުރެއްވުން އޮތީ މިރޭގައެވެ. 

މަސްވެރިންގެ ގުންޒަރު ބޭއްވި ހެންވޭރު މީރުމާއަށް ރައީސުލްޖުމްހޫރިއްޔާ ވަޑައިގެންނެވުމުން އެމަނިކުފާނަށް މަރުޙަބާ ދެންނެވީ، މިނިސްޓަރ އޮފް ފިޝަރީޒް އެންޑް އޯޝަން ރިސޯސް އަޙްމަދު ޝިޔާމެވެ.

ރައީސުލްޖުމްހޫރިއްޔާ ވަނީ، މަސްވެރިންގެ ގުންޒަރުގައި ބައިވެރިވި މަސްވެރިންނާއި މަސްވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކާއި ބައްދަކު ކުރައްވައި، މަސްވެރިކަމުގެ ދާއިރާ ކުރިއެރުވުމަށް މިސަރުކާރުގެ ސިޔާސަތުތަކާއި ގުޅޭ ގޮތުން ވާހަކަފުޅު ދައްކަވައި، އަދި މަސްވެރިންގެ ގުންޒަރުގެ ބައިވެރީން ކުރެއްވި ސުވާލުތަކަށް ޖަވާބު ދެއްވާފައެވެ.

ދިވެހިރާއްޖޭގެ މަސްވެރިންގެ ދުވަހާއި ގުޅިގެން ބޭއްވި މަސްވެރިންގެ ގުންޒަރު މިއަދު ހުޅުއްވައިދެއްވީ، މިނިސްޓަރ އޮފް ފިޝަރީޒް އެންޑް އޯޝަން ރިސޯސް އަޙްމަދު ޝިޔާމެވެ. މިހަރަކާތް މިރޭ ވަނީ ނިންމާލާފައެވެ. މަސްވެރިންގެ ދުވަސް ފާހަގަކުރުމުގެ ގޮތުން އިއްޔެ ހުޅުމާލެ ސެންޓްރަލް ޕާކުގައިވެސް ވަނީ، މިފްކޯއިން އިންތިޒާމްކޮށްގެން ކުޑަކުދިންގެ ހަވީރެއް ބާއްވާފައެވެ.

މިއަހަރުގެ މަސްވެރިންގެ ދުވަސް ޤައުމީ ފެންވަރުގައި ފާހަގަކުރެއްވުމަށް، މިނިސްޓްރީ އޮފް ފިޝަރީޒް އެންޑް އޯޝަން ރިސޯސްއިން ނިންމާފައި ވަނީ މާލޭގައެވެ.

ކޮންމެ އަހަރެއްގެ ޑިސެމްބަރު މަހުގެ 10 ވަނަ ދުވަސް ދިވެހިރާއްޖޭގެ މަސްވެރިންގެ ދުވަހުގެ ގޮތުގައި ފާހަގަކުރާއިރު، މިއަހަރު މިފާހަގަކުރަނީ ދިވެހިރާއްޖޭގެ 43ވަނަ މަސްވެރީންގެ ދުވަހެވެ.