ރައީސް ޔާމިނުގެ ވެރިކަމުގައި އެމަނިކުފާނާއި އެންމެ އަރިހުގައި އުޅުއްވި، މިހާރުގެ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފްވެސް ރައީސް ޔާމީނާއި ދެކޮޅުކަން ހާމަކުރައްވައިފިއެވެ.

ރިޔާސީ އިންތިޚާބުގައި، ޑރ. މުޙައްމަދު މުޢިއްޒުގެ ރަނިން މޭޓުގެ ގޮތުގައި ހުންނެވި، އަދި މިހާރުގެ ނައިބު ރައީސް ހުސައިން މުޙައްމަދު ލަޠީފް ކުރެއްވި އެކްސްގައި ކުރެއްވި ޕޯސްޓެއްގައި ވިދާޅުވީ، މިވެރިކަމަކީ އެމަނިކުފާނުވެސް ހިމެނޭހެން، އެތައް ރައްޔިތުންގެ ބައިވެރިވުމާއި ބުރަ މަސައްކަތުން ގެނެވުނު ވެރިކަމެއް ކަމަށެވެ. އަދި މިވެރިކަމަކީ ރައްޔިތުންނަށް ލާބައާ މަންފާހުރި، ނަފާވެރި ވެރިކަމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެކު ސާބިތުވެ ހުންނާނެ ކަމުގެ ޔަޤިންކަން އަރުވާކަމުގައިވެސް ރައިީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވަނީ ވިދާޅުވެފައެވެ.

ރައީސުލްޖުމްހޫރިއްޔާ، ޑރ. މުހައްމަދު މުޢިއްޒުގެ ވެރިކަމަށް އެންމެ ހަފްތާއެއް ފުރިހަމަވިއިރު، މިވެރިކަން ގެނައުމުގައި އެންމެ މުހިއްމު ދައުރެއް އަދާކުރެއްވި ކަމަށް ގިނަ ބަޔަކު ޤަބޫލުކުރާ، ކުރީގެ ރައީސް ޢަބުދުﷲ ޔާމީން ޢަބުދުލްޤައްޔޫމް ވަނީ ޕީޕިއެމްއިން ވަކިވެވަޑައިގެން ސަރުކާރާއި ފެއަށް ޖެހިވަޑައިގެންފައެވެ. ރައީސް ޔާމީން އަމިއްލަފުޅު އެހެން ސިޔާސީ ޕާޓީއެއް އުފެއްދެވުމުގެ މަސައްކަތް ފައްޓަވާފައި ވާއިރު، އެމަނިކުފާނުގެ ދިފާޢުގައި ކުރިން ނުކުތް ޕީޕީއެމްގެ އިސްސަފުގައި ތިއްބެވި ބޭފުޅުންގެ ތެރެއިން ސަރުކާރުގެ މަޤާމުތައް ލިބިވަޑައިގެންފައިވާ ހުރިހާ ބޭފުޅުން ގެންދަވަނީ، ރައީސް ޔާމީނާއި ދެކޮޅުކަން ހާމަކުރަމުންނެވެ.