ވަކި ފަރުދަކަށްވުރެ ޤައުމު ބޮޑުކަމުގައި ވިދާޅުވެ، ރައީސް ޑރ. މުޙައްމަދު މުޢިއްޒުގެ އެޑްވައިޒަރަކަށް ޢައްޔަނުކޮށްފައިވާ އަބުދުއްރަޙީމް ޢަބުދުﷲ ރައީސް ޔާމީނަށް ނުސީދާ ބަހުގެ ހަމަލާތަކެއް ދެއްވައިފިއެވެ.

ރައީސްް ޔާމީނަށް ރައްދުވާގޮތަށް އަބުދުއްރަޙީމް ނުސީދާ ގޮތެއްގައި ބަހުގެ ހަމަލާތަކެއް ދެއްވާފައި މިވަނީ، ރައީސް ޑރ. މުޙައްމަދު މުޢިއްޒުގެ ސަރުކާރާއި ނުރުހި، ކުރީގެ ރައީސް، ޢަބުދުﷲ ޔާމީން ޢަބުދުލްޤައްޔޫމް، ޕީޕިއެމްއިން ވަކިވެވަޑައިގެންފައި ވަނިކޮށެވެ. ރައީސް ޔާމީނު، ރައީސް ޑރ. މުޙައްމަދު މުޢިއްޒާއި މެދު ނުރުހުނު ސީދާ ސަބަބުތަކުގެ ތެރޭގައި، އެމަނިކުފާނު މިނިވަން ކުރުމަށް އެކަށީގެންވާ ގޮތެއްގައި މަސައްކަތް ނުކުރުމާއި، ސަރުކާރު އެކުލަވާލެއްވުމުގައި، ރައީސް ޔާމީނުގެ ޚިޔާލާއި މަޝްވަރާ ނުހޯއްދެވުމާއި، ރައީސް ޔާމީނާއިއެކު ޕީޕިއެމްގައި ތިއްބެވި މެމްބަރުން ޕީއެންސީއަށް ބަދަލުކުރަމުން ގެންދިޔުން ހިމެނެއެވެ.

ރައީސް ޔާމީން ޕީޕީއެމް ދޫކޮށްލައްވައި، ސަރުކާރާއި ދެކޮޅަށް ނުކުންނެވުމާއި ގުޅިގެން ޢަބުދުއްރަޙީމާއި އަދި ޕީޕީއެމްގެ އިސްމަޤާމުތަކުގައި ތިއްބެވި ބޭފުޅުންގެ ތެރެއިން މިސަރުކާރުން މަޤާމުތައް ލިބިވަޑައިގެންފައިވާ ބޭފުޅުން ވަނީ ސަރުކާރުގެ ދިފާޢު ކުރުމަށް ނުކުންނަވާފައެވެ. މިގޮތުން ރޭ ސަރުކާރުގެ އިސް މަޤާމުތަކުގައި ތިއްބެވި ބޭފުޅުން ގެންދެވީ އެބޭފުޅުން ތިއްބެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެކުގައިކަން ހާމަކޮށް ސޯޝަލް މީޑިއާގައި ޕޯސްޓްތައް ލިޔަމުންނެވެ.

މިގޮތުން ވެރިކަން ބަދަލުވުމާއި ހަމައަށް ރައީސް ޔާމީންގެ އެންމެ އަރިސް ބޭފުޅެއްގެ ގޮތުގައި ދާދިފަހަކާއި ހަމައަށް ހުންނެވި ޢަބުދުއްރަހީމް އެކްސްގައި ލިޔުއްވާފައިވާ ޕޯސްޓެއްގައި ރައީސް ޔާމީނަށް ނިސްބަތްކޮށް ވިދާޅުވީ، "އަޅުގަނޑުމެން ކޮންމެ މީހަކަށްވުރެ މިޤައުމު މާބޮޑު" ކަމަށެވެ. 

މީގެ އިތުރުން ޢަބުދުއްރަހީމްގެ ޕޯސްޓުގައި ވިދާޅުވީ، ޕީޕީއެމް ޕީއެންސީއަކީ އެންމެ ފުރަތަމަ ޤައުމު އިސްކުރާ ދެ ޕާޓީކަމަށެވެ. އަދި އެބޭފުޅުން ތިއްބެވީ ރައްޔިތުންގެ ނިންމުމާއި އެއްގޮތަށް ރައީސް ޑރ. މުޙައްމަދު މުޢިއްޒާއިއެކު ސާބިތުވެ ކަމުގައިވެސް އޭނާ ވިދާޅުވިއެވެ.

ޢަބުދުއްރަހީމަކީ، ޑރ. މުޙައްމަދު މުޢިއްޒަށް ޕީއެންސީގެ ރިޔާސީ ޓިކެްޓް ހޯދައިދިނުމުގައި، އަދި މުޢިއްޒުއަށް ވެރިކަން ހޯދައި ދިނުމުގައި ރައީސް ޔާމީންގެ ނިންމުންތަކާއި ޚިލާފަށް ޢަމަލީ ގޮތުން މަސައްކަތް ކުރެއްވި ބޭފުޅެކެެވެ. 

ރައީސް ޔާމީނުގެ ސަޕޯޓަރުން ތުހުމަތުތައް ކޮށްފައިވާ ގޮތުގައި 2018 ވަނަ އަހަރުގެ ރިޔާސީ އިންތިޚާބުގައި، ރައީސް ޔާމީނަށް ނާކާމިޔާބުވުމުގެ ޒިންމާ އުފުލަންޖެހޭ އެއްބޭފުޅަކީވެސް ޢަބުދުއްރަޙީމެެވެ.

ރައީސުލްޖުމްހޫރިއްޔާގެ މަޤާމަށް ޑރ. މުޙައްމަދު މުޢިއްޒު ވަޑައިގެންނެވުމަށްފަހުގައި، ރައީސް ޔާމީނާއި އެކުގައި ތިއްބެވި ސިޔާސީ ގޮތުން އިސް ބޭފުޅުންނަށް ސަރުކާރުގެ މަޤާމުތައް ދެއްވައިގެން ޕީޕީއެމްއާ ޕީއެންސީގެ ކޮންޓްރޯލް ރައީސް ޔާމީނުގެ އަތްޕުޅުން ވަނީ އަތުލައްވާފައެވެ.