އިންޑިއާއާއި އެކުވެސް ގުޅިގެން މަސައްކަތް ކުރަން ދިވެހިރާއްޖޭން ތައްޔާރުކަމަށް ފޮރިން މިނިސްޓަރ މޫސާ ޒަމީރު ވިދާޅުވެއްޖެއެވެ.

ޑރ. މުޙައްމަދު މުޢިއްޒުގެ ސަރުކާރުގެ ފޮރިން މިނިސްޓަރަކަށް ޢައްޔަނުކުރެއްވި މޫސާ ޒަމީރަށް އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ. އެސް ޖައިޝަންކަރ ވަނީ މަރުޙަބާ ދަންނަވާފައެވެ. އެކްސްގައި ކުރެއްވި ޕޯސްޓެއްގައި އައު ސަރުކާރާއެކު އިންޑިއާއި ރާއްޖެއާއި ދެމެދު އޮތް ޚާއްސަ ގުޅުން އިތުރަށް ބަދަހިކުރެއްވުމުގެ ޝަޢުގުވެރިކަން ފާޅުކުރެއްވިއެވެ.

މި ޕޯސްޓަށް ޖަވާބު ދެއްވަމުން މިނިސްޓަރ ޒަމީރު ވިދާޅުވީ، ރާއްޖެއާއި އިންޑިއާގެ މަސްލަހަތާއި، ކަންބޮޑުވާ ކަންކަމުގައި، އެކީގައި މަސައްކަތްކުރައްވަން އުއްމީދުކުރައްވާކަމަށެވެ. އަދި ދެޤައުމުގެ ރައްޔިތުންގެ ކުރިއެރުމަށްޓަކައި، ދެޤައުމުގެ ދެމެދުގައި ޒަމާނުއްސުރެ ގާތްގުޅުން ކުރިއެރުވުމަށް މަސައްކަތްކުރައްވާނެކަމަށް މިނިސްޓަރ ޒަމީރު ވިދާޅުވިއެވެ.

އިންޑިއާއާ އެކު ގުޅުން ބަދަހިކުރާނީ ރާއްޖޭގެ ރައްޔިތުންގެ މަސްލަހަތު އިސްވާ ގޮތަށް ކަމަށް ފޮރިން މިނިސްޓަރު ވިދާޅުވި އިރު، މި ސަރުކާރުން ވެރިކަމަށް އައީ ރާއްޖޭގައި ތިބޭ އިންޑިއާ ސިފައިންނަށް ރާއްޖޭގައި ނުތިބެވޭނެ ކަމަށް ބުނަމުންނެވެ.

މި ސަރުކާރުގެ ފޮރިން ޕޮލިސީއަކަށް ވާނީ 'ޕްރޯ މޯލްޑިވްސް' ސިޔާސަތެއް ކަމަށް ކެމްޕޭނުގެ ތެރޭގައި ވެސް ރައީސް ވަނީ ތަކުރާރުކޮށް ވިދާޅުވެފައެވެ.

ރައީސް ޑރ. މުހައްމަދު މުއިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރަން އިއުލާނުކޮށްފައިވާ ކަންތައްތަކުގެ ތެރޭގައި ވެސް ރާއްޖޭގައި ތިބި ބޭރުގެ ސިފައިން ބޭލުމުގެ މަސައްކަތް ފެށުން ހިމަނާފައިވެއެވެ.