އިންތިޚާބީ ރައީސް ޑރ. މުޙައްމަދު މުއިއްޒާއި އެމަނިކުފާނުގެ ނައިބު ހުސައިން މުޙައްމަދު ލަޠީފް މަޤާމުގެ ހުވާކުރެއްވުމަށް ބާއްވާ ރައްޔިތުންގެ މަޖިލީހުގެ ޖަލްސާގައި ރައީސް ޔާމީން ބައިވެރިވެވަޑައި ނުގަންނަވާނެ ކަމުގައި އެމަނިކުފާނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ބައެއް ބޭފުޅުން ވިދާޅުވެއްޖެއެވެ. 

އިންތިޚާބީ ރައީސާއި އެމަނިކުފާނުގެ ނައިބު ހުވާކުރެއްވުމަށް ބާއްވާ ރައްޔިތުންގެ މަޖިލީހުގެ ޚާއްޞަ ޖަލްސާ އޮންނާނީ، މިއަދު ހަވީރު، 4:45ގައި ޖުމްހޫރީ މައިދާނުގައެވެ.

ރައީސްޔާމީނުގެ ވަކީލުންގެ ޓިމުގައި ހިމެނިވަޑައިގަންނަވާ ބޭފުޅުން ހާމަކުރައްވާފައިވާ ގޮތުގައި، ރައީސް ޔާމީނު، ޑރ. މުއިއްޒު ހުވާކުރެއްވުމުގެ ރަސްމިއްޔާތަށް ވަޑައިނުގަންނަވަނީ، އެމަނިކުފާނު ތަންފީޒްކުރައްވަމުން ގެންދަވާ ޖިނާއީޙުކުމުން ސަލާމަތްވެފައި ނުވާތީ ކަމަށެވެ. ރިޔާސީ އިންތިޚާބު ޑރ. މުއިއްޒު ކާމިޔާބު ކުރެއްވީ، ރައީސް ޔާމީންގެ ސަޕޯޓަރުންގެ ތާޢީދު ހޯއްދަވައިގެންނެވެ. ރައީސް ޔާމީން މިނިވަންކޮށްދެއްވުމަކީ، އިންތިޚާބީ ރައީސް ޑރ. މުޙައްމަދު މުއިއްޒު ޕީޕިއެމް ޕީއެންސީގެ ސަޕޯޓަރުންނަށް ވެވަޑައިގެންފައިވާ ރިޔާސީ ވަޢުދެކެވެ. އެ ވަޢުދާއި އެއްގޮތަށް ރައީސް ޔާމީން މިނިވަންވެފައި ނުވާތީ، އެކަމުގެ ކަންބޮޑުވުން ސަޕޯޓަރުން ގެންދަނީ ފާޅުކުރަމުންނެވެ.

އިންތިޚާބީ، ރައީސް، ޑރ. މުޙައްމަދު މުޢިއްޒާއި އެމަނިކުފާނުގެ ނައިބު ޙުސައިން މުޙައްމަދު ލަޠީފް ހުވާކުރެއްވުމުގެ ޖަލްސާއަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަޑައިގަންނަވާނެ ކަމުގައި މައުލޫމާތު ލިބިފައިވެއެވެ. އަދި މިޖަލްސާގައި ކުރީގެ ރައީސް މައުމޫނާއި، ކުރީގެ ރައީސް ޑރ. މުޙައްމަދު ވަޙީދު ހަސަން މަނިކާއި ކުރީގެ ރައީސް މުޙައްމަދު ނަޝީދު ބައިވެރިވެވަޑައިގަންނަވާނެއެވެ.

2018 ވަނަ އަހަރުގެ ރިޔާސީ އިންތިޚާބު ކާމިޔާބު ކުރައްވައި، ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް، ހުވާކުރެއްވި ދަރުބާރަށް، ދިވެހިރާއްޖޭގައި ރައީސުލްޖުމްހޫރިއްޔާކަން ކުރެއްވި، އަދި ދުނިޔޭގައި ތިއްބެވި ބޭފުޅުންގެ ތެރެއިން ރައީސް ޔާމީން ފިޔަވައި ހުރިހާ ބޭފުޅުން ބައިވެރިވެވަޑައިގެންނެވިއެވެ. މިފަހަރުވެސް ރައީސް ޔާމީން ފިޔަވައި ކުރީގެ ހުރިހާ ރައީސުން މިރަސްމިއްޔާތުގައި ބައިވެރިވެވަޑައިގަންނަވާނެ ކަމުގައި މައުލޫމާތު ލިބިފައިވެއެވެ.