ސަރުކާރުގެ މަސްކުންފުނި މިފްކޯއަށް މަސްގަންނަ އަގުދަށް ކުރަން އުޅޭ ކަމަށްބުނެ ފަތުރާ ޚަބަރުތައް އެކުންފުނިން ދޮގުކޮށްފިއެވެ.

މިފްކޯއަށް 25ރ އަށް މަސްކިލޯއެއް ގަނެގެން ކުންފުންޏަށް ގެއްލުންތައްވަމުންދާތީ، މަސްގަންނަ އަގު ރިވިއުކޮށް އަގު ދަށްކުރުމަށް ކުންފުނިން މަސައްކަތްކުރަމުންދާކަމުގައި ރާއްޖޭގެ ބައެއް މީޑިއާތަކުން ވަނީ ރިޕޯޓްކޮށްފައެވެ. އެހެން ނަމަވެސް އެކަމާއި ގުޅޭ ގޮތުން މިފްކޯއިން ނެރުނު ނޫސްބަޔާނުގައި ބުނެފައި ވަނީ، ފަތުރަމުން ގެންދަނީ ދޮގު ޚަބަރެއް ކަމަށާއި، މަސްގަންނަ އަގު ދަށްކުރުމުގެ ވިސްނުމެއް އެކުންފުނިން ނުގެންގުޅޭ ކަމަށެވެ. އަދި މަސްގަންނަ އަގު ރިވިއު ކުރުމާއި ގުޅޭ ގޮތުން، ފިނޭންސް މިނިސްޓްރީއާ އަދި ސަރުކާރުގެ އެހެން އިދާރާއާއެކުވެސް މިފްކޯއިން މަޝްވަރާކުރަމުން ނުދާ ކަމުގައި އެކުންފުނިން ވަނީ ބުނެފައެވެ. އަދި މަސްކިރުވައި މަސްވެރިންނަށް ދޫނުކުރެވި ހުރި ފައިސާ މަސްވެރިންނަށް ދައްކައި ޚަލާސްކުރުމުގެ މަސައްކަތް ކަމާއި ގުޅުންހުރި ފަރާތްތަކާއި އެކު ކުރަމުންދާ ކަމުގައިވެސް މިފްކޯއިން ބުންޏެވެ.

މިފްކޯއިން ނެރުނު ބަޔާނުގައި ބުނީ ހުސްވި ސެޕްޓެމްބަރު މަހު، މިފްކޯއަށް މަސްކިލޯއެއް ގަންނަ އަގު 17ރ އިން 25ރ އަށް ބޮޑުކޮށްފައި ވަނީ، ޔޫރަޕްގެ މާކެޓަށް ވިއްކާމަހުން ނަގާ %22 ގެ ޑިއުޓީ ކަނޑާލަން ސަރުކާރާއި، ޔޫރަޕިއަން ޔޫނިއަންއާއެކު ކުރެވުނު ގިނަ މަޝްވަރާތަކުން އުންމީދީ ނަތީޖާއެއް ލިބިފައިވާތީ ކަމަށެވެ. މީގެ އިތުރުން މިހާރު މުޅި ރާއްޖެއަށްވެސް މަސްވެރިކަން ރަނގަޅުކަމަށާއި، ދުވާލެއްގެ މައްޗަށް އެވްރެޖްކޮށް 450 ޓަނުގެ މަސް މިފްކޯއަށް ގަންނަމުންދާ ކަމުގައިވެސް އެކުންފުނިން ނެރެފައިވާ ބަޔާނުގައި ވަނީ ބުނެފައެވެ.

Advertisement