ސިއްހީ ސާމާނު ނުހޯދިގެން، އެ ދާއިރާގެ ހިދުމަތްތަކަށް ހުއްޓުން ނާންނާނެކަމުގެ ޔަގީންކަން ސަރުކާރުން ދީފިއެވެ. ސަރުކާރުން މިގޮތަށް ބުނީ ސަރުކާރުގެ އެންމެ ބޮޑު ހޮސްޕިޓަލު، އައިޖީއެމްއެޗްގައި ގާއިމުކޮށްފައިވާ ހިތުގެ ބަލިތަކާއި ކިޑްނީގެ ބަލިތަކަށް ފަރުވާ ދޭ ސެންޓަރު ހިންގަމުން އަންނަ ބޭރުގެ ކުންފުންޏަށް ދައްކަން ޖެހޭ 5.3 މިލިއަން ޑޮލަރު ނުދައްކާ އޮތުމުން، އެ ކުންފުނީގެ ފަރާތުން ދެމުންދާ ހިދުމަތް ހުއްޓާލަފާނެ ކަމުގެ ކަންބޮޑުވުން އިންތިހާބީ ރައީސް އޮފީހުން ފާޅުކޮށްފައިވަަނިކޮށެވެ. 

މިކަމަށް ރައްދުދީ ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވީ ސިއްހީ ހިދުމަތްތައް ހުއްޓުމަކަށް ނާންނާނެ ކަމަށާއި ކޮވިޑް-19 ދުވަސްވަރު ވެސް ސިއްހީ ދާއިރާއަށް ބޭނުންވާ ސާމާނު ހުއްޓުމެއް ނެތި ގެނައި ގޮތަށް މިހާރުވެސް ލިބޭނެ ކަމަށެވެ. މިއުވާން ވަނީ ރައްޔިތުންގެ ހިތުގައި ބިރުވެރިކަމާ ހާސްކަން އުފެދޭ ގޮތަށް، ލިބޭ މައުލޫމާތުގެ އެއްބައި ބޭނުންކޮށްގެން މިފަދަ ވާހަކަތައް ނުފެތުރުން އެދިފައެވެ.

އިންތިހާބީ ރައީސްގެ ތަރުޖަމާނު މުހައްމަދު ފިރުޒުލް އަބްދުﷲ ހަލީލް ވިދާޅުވީ، އައިޖީއެމްއެޗުގެ އިސް ވެރިންނާ އެކު ބޭއްވި ބައްދަލުވުންތަކުން ބޮޑެތި ކަންބޮޑުވުންތަކެއް އެ ކޮމިޓީއަށް ފާހަގަކުރެވިފައިވާ ކަމަށެވެ. އެގޮތުން، އޭނާ ވިދާޅުވީ އެ ހޮސްޕިޓަލުގައި ގާއިމުކޮށްފައިވާ ބައެއް ހާއްސަ ސެންޓަރުތައް ހިންގަނީ ބޭރުގެ އެކި ހޮސްޕިޓަލްތަކާއި ކުންފުނިތަކާ ގުޅިގެންކަމަށެވެ. އޭގެ ތެރެއިން ކިޑްނީގެ ބަލިތަކަށް ހާއްސަ ސެންޓަރާއި ހިތުގެ ބަލިތަކަށް ހާއްސަ ސެންޓަރުން ފޯރުކޮށްދޭ ހިދުމަތްތައް ހުއްޓިދާނެ ކަމުގެ ބިރު އެބައޮތްކަމަށް އޭނާ ވަނީ ނޫސްވެރިންގެ ބައްދަލުވުމުގައި ބުނެފައެވެ.

Advertisement

މި ދެ ސެންޓަރަށް ހިދުމަތް ފޯރުކޮށްދޭ ބޭރުގެ ކުންފުންޏަށް ނުދައްކާ އޮތް ފައިސާގެ ގޮތުގައި 5.3 މިލިއަން ޑޮލަރުގެ ބިލުތަކެއް އެބަހުރިކަމަށާއި، މި ބިލުތަކުގެ ތެރޭގައި ހިމެނެނީ އެ ކުންފުނިން ފޯރުކޮށްދީފައިވާ އެކިއެކި ސިއްހީ ސާމާނާ ގުޅޭ ހަރަދުތަައްކަމަށްވެސް ވަނީ ބުނެފައެވެ.