ވެރިކަން ބަދަލުކުރުމުގެ މަރުހަލާގައި ސަރުކާރުން ދެމުންދާ އެއްބާރުލުމާމެދު ހިތްހަމަޖެހިވަޑައިގަންނަވާ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. މުއިއްޒު މިހެން ވިދާޅުވީ އަމިއްލަ ޓީވީއަކަށް ދެއްވި އިންޓަވިއުއެއްގައެވެ.

ޑރ. މުއިއްޒު، ވިދާޅުވީ ވެރިކަން ބަދަލުކުރުމުގެ މަރުހަލާގައި ކުރަންޖެހޭ ކަންކަން ކުރުމަށް ރައީސް އޮފީހުން ވެސް، އަދި ސިވިލް ސާވިސް ކޮމިޝަނުން ވެސް އެއްބާރުލުން ދެމުންގެންދާ ކަމަށެވެ.

"ރައީސް އޮފީހުން ހަމަ ވަރަށް ބޮޑު އެއްބާރުލުމެއް ދެއްވާތަން ފެނޭ. ސިވިލް ސާވިސް ކޮމިޝަނުން ވެސް އެއްބާރުލުން އެބަ ދެއްވަވާ،" މުއިއްޒު ވިދާޅުވިއެވެ.

މުއިއްޒު ވިދާޅުވީ، އިންތިގާލީ މަރުހަލާގެ ކަންކަން ވަރަށް ރަނގަޅަށް ކުރިއަށްދާކަމަށެވެ. އެ މަސައްކަތް ކުރިއަށް ގެންދާއިރު، ބައްދަލުވުންތަކަށް އެއްވެސް އޮފީހަކުން ވަގުތު ނުދިނުމާއި، މައުލޫމާތު ހިފެހެއްޓުން ފަދަ ކަމެއް ވެސް ދިމާ ނުވާކަން ޑރ. މުއިއްޒު ފާހަގަ ކުރެއްވިއެވެ. ކުރިއަށް މިއޮތް މަހެއްހާ ދުވަސްތެރޭގައި ވެސް އެ މަސައްކަތް ފުރިހަމައަށް ކުރިއަށް ގެންގޮސް ނިންމާލެވޭނެ ކަމަށް އުއްމީދު ކުރައްވާ ކަމަށްވެސް މުއިއްޒު ވަނީ ވިދާޅުވެފައެވެ. 

އިންތިގާލީ މަރުހަލާ ކޮމިޓީގެ ޑިރެކްޓަ ޖެނެރަލްއަކަށް ޕީއެންސީގެ ޗެއާޕާސަން، އަދި ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެމްބަރު އަބްދުއްރަހީމް އަބްދުﷲ އައްޔަންކޮށް، އާ ސަރުކާރު ވެރިކަމާ ހަވާލުވުމަށް ތައްޔާރުވުމުގެ ގޮތުން ކުރަންޖެހޭ ކަންކަން ކުރިއަށް ގެންދިޔުމަށް 15 ކޮމިޓީއެއް އެކުލަވާލައި، އޮފީސްތަކާ މިހާރު ދަނީ ބައްދަލު ކުރަމުންނެވެ. މިހާރުވެސް ސަރުކާރުގެ ގިނަ ކުންފުނިތަކަކާއި މުވައްސަސާތަކާއި ބައްދަލުކޮށް އެ ތަންތަނުގެ މަސައްކަތްތަކާއި ގުޅޭ ގޮތުން އިންތިހާބީ ރައީސްގެ ޓީމުތަކުން ވަނީ މައުލޫމާތު ހޯދާފައެވެ.