ދިވެހިރާއްޖެއިން އެކުވެރި އަރަބި އިމާރާތާއި ބަންގްލަދޭޝަށް ކަނޑައަޅުއްވާ ސަފީރުން އައްޔަންކުރަން ރައްޔިތުންގެ މަޖިލީހުގެ ރުހުން ހޯދުމަށް ހުށައަޅައިފިއެވެ.

ރާއްޖެ އިން ޔޫއޭއީ އަށް ކަނޑައަޅާ އާ ސަފީރަކަށް، އައްޔަން ކުރުމަށް ރައްޔިތުންގެ މަޖިލިހުގެ ރުހުން ހޯދަން ސަރުކާރުން ހުށައަޅާފައިވަނީ މިދުފާ ނައީމްއެވެ. އޭނާއަކީ ހާރިޖީ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވަމުން ގެންދަވާ ފަރާތެކެވެ.

ރައީސް އިބްރާހިމް މުހައްމަދު ސޯލިހު މިއަދު މަޖިލީހަށް ފޮނުއްވި ސިޓީފުޅުގައި ވިދާޅުވީ، ޔޫއޭއީގައި މިހާރު ހުންނެވި ސަފީރު ހ. މިސްޓީލޮޖް އައިމިނަތު ޝަބީނާގެ ބަދަލުގައި މިދުފާ ހަމަޖައްސަން ނިންމާފައިވާ ކަމަށެވެ.

ބަންގްލަދޭޝްގައި މިހާރު ހުންނެވި ދިވެހި ސަފީރު މ. ޒީނާ ޝިރުޒިމަތު ސަމީރުގެ ބަދަލުގައި ސ. ހުޅުދޫ އަސަރީގެ ޝިއުނީން ރަޝީދު ހަމަޖެއްސެވުމަށް ވެސް ރައީސް މަޖިލިހަށް ވަނީ ފޮނުވާފައެވެ.

މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަނީ އެ ދެ ބޭފުޅުންގެ ނަން ދިރާސާ ކުރުމަށް މަޖިލީހުގެ ހާރިޖީ ގުޅުންތަކުގެ ކޮމިޓީ އަށް ފޮނުއްވަން ނިންމަވައިފައެވެ.