އިންތިހާބީ ރައީސް ޑރ. މުހައްމަދު މުއިއްޒުގެ ފަރާތުން އިންތިގާލީ މަަސައްކަތްތަކަށް އެކުލަވައިލި ޓީމުތަކުގެ ތެރެއިން އިސްލާމިކް މިނިސްޓްރީއަށް ކަނޑައެޅި ޓްރާންސިޝަން ކޮމެޓީން އެ މިނިސްޓްރީގެ އިސް ވެރިންނާ ބައްދަލުކޮށްފިއެވެ.

މި ބައްދަލުވުން އޮތީ އިސްލާމިކް މިނިސްޓްރީގައެވެ. އެ ބައްދަލުވުމުގައި އިސްލާމިކް މިނިސްޓަރު ޑރ. އަހްމަދު ޒާހިރު ވަނީ އިންތިހާބީ ރައީސް މުއިއްޒުއަށާއި އެމަނިކުފާނުގެ ފަރާތުން އެ މިނިސްޓްރީއަށް ޒިޔާރަތްކުރި ކޮމެޓީގެ މެމްބަރުންނަށް މަރުހަބާ ވިދާޅުވެފައެވެ. އަދި އެ ކޮމެޓީއަށް ބޭނުންވާ މައުލޫމާތު މިނިސްޓަރު ވަނީ ހިއްސާކުރައްވާފައެވެ.

ޓްރާންސިޝަން ކޮމެޓީގެ ފަރާތުން ކުރީގައި އިސްލާމިކް މިނިސްޓަރުކަން ކުރައްވާފައިވާ ޑރ. މުހައްމަދު ޝަހީމް ވަނީ މި މަރުހަލާގައި ބޭނުންވާ މައުލޫމާތު ފަސޭހަކަމާ އެކު ހޯދައިދިނުމަށާއި އެ ކޮމެޓީން ކުރާ މަސައްކަތްތަކަށް މިނިސްޓްރީން ލިބޭ އެހީތެރިކަން ފާހަގަކުރައްވައި، އެކަމަށް ޝުކުރު އަދާކުރައްވައިފައެވެ.

ފޮޓޯ: އިސްލާމިކް މިނިސްޓްރީ

ޝަހީމްގެ އިތުރުން ޓްރާންސިޝަން ކޮމެޓީގައި، އިސްލާމިކް މިނިސްޓަރުކަން ކުރެއްވި ޑރ. އަހްމަދު ޒިޔާދު ބާގިރު ވެސް ހިމެނިވަޑައިގަންނަވައެވެ.

އިންތިހާބީ ރައީސް ޑރ.މުއިއްޒުގެ ފަރާތުން ޑިރެކްޓަ ޖެނެރަލް އޮފް ޓްރާންސިޝަންގެ މަގާމަށް، ހަމަޖައްސާފައިވަނީ ޕީއެންސީގެ ޗެއާޕާސަން އަބްދުއްރަހީމް އަބްދުﷲ އެވެ. ރައީސް ސޯލިހް ވަނީ، އިންތިހާބީ ރައީސްގެ އޮފީސް ސްޓެލްކޯ އިމާރާތުގެ ފަސް ވަނަ ފަންގިފިލާގައި ޤާއިމްކޮށްފައެވެ.