އަންނަ އަހަރުގެ ދައުލަތުގެ ބަޖެޓު ފާސްކުރުމަށް އިންތިހާބީ ރައީސް ޑރ. މުހައްމަދު މުއިއްޒުގެ ސަރުކާރަށް އެމްޑީޕީގެ ފަރާތުން ފުރިހަމަ އެއްބާރުލުން ދޭނެ ކަމަށް އެމްޑީޕީގެ ޕާލިމަންޓަރީ ގްރޫޕްގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ. 

އަސްލަމް މިހެން ވިދާޅުވީ، މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމަށްޓަކައި އެމްޑީޕީގެ 49 މެމްބަރުންގެ ސޮޔާ އެކު ދެ ވަނަ ފަހަރަށް މަޖިލީހަށް ވައްދާފައިވާ އިތުބާރު ނެތް ކަމުގެ މައްސަލަ އާއި މަޖިލީހުގެ މަސައްކަތްތައް ކުރިއަށްދާ ގޮތާ ބެހޭ ގޮތުން ބޭއްވި ނޫސްވެރިންގެ ބައްދަލުވުމުގައެވެ. 

އަސްލަމް ވިދާޅުވީ، ސަރުކާރަށް ޖެއްސުން ކުރުމުގެ ނިޔަތުގައި އެ ޕާޓީގެ މެމްބަރުން މަޖިލިސް މެދުވެރިކޮށް އެއްވެސް ކަމެއް ނުކުރާނެ ކަމަށެވެ. އޮޕޮޒިޝަން ޕާޓިއެއްގެ ގޮތުގައި އެމްޑީޕީން ވަރުގަދައަށް ހަރަކާތްތެރިވަމުން ދާނެކަމަށާއި، ނަމަވެސް ސަރުކާރަށް އުނދަގޫކުރުމާއި ޖެއްސުންކުރުމުގެ ނިޔަތުގައި މަޖިލީހުގެ ތެރެއިން އެއްވެސް ކަމެއް ނުކުރާނެ ކަމުގެ ޔަގީންކަން އަސްލަމް ވަނީ ދެއްވާފައެވެ.

"އަޅުގަނޑުމެންގެ އެއްވެސް ރޫހެއް ނެތް ސަރުކާރަށް ދަތިކުރުމުގެ ގޮތުން އެއްވެސް ކަމެއް ކުރާކަށް. އަޅުގަނޑުމެންގެ މަސްއޫލިއްޔަތަކަށް ވާނީ މި ދެންނެވި އާ ސަރުކާރު އެކުލެވުމަށް ފަހު އެ ސަރުކާރެއް ޖަވާބުދާރީ ކުރުވުން. ޒިންމާދާރުކަމާ އެކު އަޅުގަނޑުމެން އެކަން ކުރަމުން ގެންދާނީ،" އަސްލަމް ވިދާޅުވިއެވެ.

ގާނޫނުއަސާސީގެ 96ވަނަ މާއްދާގައިވާ ގޮތުން، އެންމެ ލަސްވެގެން ކޮންމެ އަހަރެއްގެ 1 ނޮވެމްބަރުގެ ކުރިން، އަންނަ އަހަރުގެ ދައުލަތުގެ ބަޖެޓު މަޖިލީހަށް ހުށަހަޅަންޖެހެއެވެ. ބަޖެޓު ދިރާސާކޮށް ބަހުސްކުރުމަށް ފަހު، ބަޖެޓު ފާސް ކުރެވޭނީ މަޖިލީހުގެ އަގުލަބިއްޔަތުންނެވެ.