ފަރެސްމާތޮޑާ ދާއިރާގެ ބައި އިލެކްޝަން ނޯންނާނެކަމަށް އިލެކްޝަންސް ކޮމިޝަނުން ބުނެފިއެވެ. އީސީއިން މިހެން ބުނެފައިވަނީ ފަރެސްމާތޮޑާ ދާއިރާގެ މެންބަރު އިންތިހާބީ ނައިބު ރައީސްކަމަށް ހޮވިފައިވުމާއި ގުޅިގެން އެ ދާއިރާގެ ގޮނޑި ހުސްކަމަށް އަންނާނެތީ އެކަމަށް އިޝާރާތްކުރައްވަމުންނެވެ.

ރިޔާސީ އިންތިހާބު ކާމިޔާބު ކުރެއްވި އިންތިހާބީ ރައީސް ޑރ. މުހައްމަދު މުއިއްޒުގެ ރަނިންމޭޓަކަށް ހުންނެވި ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް އަންނަ ނޮވެމްބަރު 17 ގައި ނައިބު ރައީސްގެ މަގާމަށް ހުވާ ކުރައްވާނެއެވެ. އެއާއެކު ރައްޔިތުންގެ މަޖިލީހުގައި އޭނާ ތަމްސީލް ކުރެއްވި ދާއިރާ ފަރެސްމާތޮޑާ ދާއިރާގެ ގޮނޑި ހުސްވާނެއެވެ.

އީސީގެ ނައިބު ރައީސް އިސްމާއިލް ހަބީބް ކުރެއްވި ޓުވީޓެއްގައި ވިދާޅުވީ، ގާނޫނުއަސާސީގެ 78 ވަނަ މާއްދާގައި ބުނާ ގޮތުން މެންބަރަކު ވަކިވުމުގެ ސަބަބުން ހުސްވާ ގޮނޑިއަށް އެ ގޮނޑި ހުސްވި ތާރީހުން ފެށިގެން 60 ދުވަހުގެ ތެރޭގައި މެންބަރަކު އިންތިހާބު ކުރަން ޖެހޭނެއެވެ. އެހެން ނަމަވެސް މެންބަރެއްގެ ގޮނޑި ހުސްވާ ތާރީހާއި ރައްޔިތުންގެ މަޖިލީހުގެ އިންތިހާބާ ދެމެދު 6 މަސް ނުވަތަ އެއަށް ވުރެ ކުރު މުއްދަތެއް އޮތް ނަމަ އެ ގޮނޑިއަކަށް މެންބަރަކު އިންތިހާބު ކުރާކަށް ނުޖެހެއެވެ.

ރައްޔިތުންގެ މަޖިލީހުގެ އިންތިހާބު އަންނަ އަހަރު ކުރީކޮޅު ބާއްވާނެއެވެ. އެހެންކަމުން ފަރެސްމާތޮޑާ ދާއިރާއަށްވެސް މެންބަރަކު ހޮވާނީ އެ އިންތިހާބުގައެވެ.