މަގާމުތައް ލިބުމުން ފިނި ކޮޓަރިއަށް ވަދެ ކަންކަން ހަނދާން ނެތޭ ބޭފުޅުން ވަރަށް ގިނަ ކަމަށް ވިދާޅުވެ، އިންތިޚާބީ ރައީސް ޑރ. މުހައްމަދު މުއިއްޒުއަށް ކުރީގެ ރައީސް އަބްދުﷲ ޔާމީން ނުސީދާކޮށް ފާޑު ވިދާޅުވެއްޖެއެވެ.

ޖަލު ހުކުމެއްގައި ހުންނަވަނިކޮށް ގެއަށް ބަދަލުކޮށްފައިވަނިކޮށް، ބުދަ ދުވަހުގެ ރޭ އެމަނިކުފާނަށް ފަރިވަޅުއެރުވުމަށް ދިޔަ ސަޕޯޓަރުންނާއި ކުޑަދޮރުކައިރީގައި ހުންނަވައިގެން ވާހަކަފުޅުފައްކަވަމުން ޔާމީން ވިދާޅުވީ މިހާރުވެސް ފެނިގެން މިދަނީ އެތައް މަސައްކަތެއް ކުރުމަށްފަހުގައި، ގޭގައި ހުންނަންޖެހުނީމަ ނޫނިއްޔާ ޖަލަށްލީމަ އާދައިގެ އާންމު ރައްޔިތުންތަކެއް، އެމަނިކުފާނު ދެކެ ލޯބިވާ ރައްޔިތުންތަކެއް ނުކުންނަތަން ކަމަށެވެ.

"އެކަމަކު ބޮޑެތި ގޮނޑިތަކުގައި ތިބޭ މީހުންނަށް އެ ފަސޭހަތައް ލިބިގެން އެ ދިޔައީ ރައީސް ޔާމީނާއި ތި ރައްޔިތުން ކުރި މަސައްކަތުން. އެހެންވީމާ އިންސާނީ ތޮބިއްޔަތަކަށް މި ވަނީ މަގާމުތަކަށް އާދެވުނީމާ އެ ކަންކަން ހަނދާން ނެތުން،" ޔާމީން ވިދާޅުވިއެވެ.

ޔާމީން ވިދާޅުވީ އެ މަނިކުފާނު ބޭނުންފުޅު ވަނީ އިންސާފުވެރި ޝަރީއަތެއްގައި މައުސޫމްކަން ރައްޔިތުންނަށް ސާބިތުކޮށްދެއްވަން ކަމަށާއި މިނިވަންކޮށްދޭން އެދި މި ސަރުކާރަށް ވެސް އަދި އެހެން ބައެއްގެ ގާތުގައި ވެސް އާދޭސް ނުކުރައްވާނެ ކަމަށެވެ. އެންމެ ބޮޑު ވަރަކަށް ވެސް ގެންދާނީ ޖަލަށް ކަމަށާއި ނަމަވެސް، ޖަލަކީ ދެ ވަނަ ދިރިއުޅުމަށް މިހާރު ހަދާފައިވާ ކަމަށް ވިދާޅުވިއެވެ.

ދޫވެހީގެ ކުޑަދޮރު ކައިރީގައި ހުންނަވައި ޔާމީން ވިދާޅުވީ، އެ މަނިކުފާނުގެ ހައްގުގައި އެންމެ ބުރަ މަސައްކަތެއް ކުރީ އާންމު ސަޕޯޓަރުންގެ ތެރެއިން އަންހެނުން ކަމަށާއި އެ މީހުން މަގުމަތީ އިހުތިޖާޖުގައި އުޅުނީ މައިންބަފައިންނާއި ދަރިން އަދި ފިރިން ގޭގައި ދޫކޮށްލުމަށް ފަހު ކަމަށާއި މަގާމުތަކަށް ވަޑައިގަންނަވާ ބޭފުޅުން ތިއްބެވީ އެކިއެކި ފިނިކޮޓަރީގައި ކަމަށެވެ. އެހެންކަމުން ވޯޓަށް އެދި ރައްޔިތުން ގާތަށް އަންނައިރު އެ ބޭފުޅުން އަންނަނީ ގައުމީ ހައްގުގައިތޯ ނުވަތަ އަމިއްލަ ކަމެއް ފުއްދަންތޯ ސާފުކުރަން ރައްޔިތުން ކިބައިން ޔާމީން އެދިވަޑައިގެންނެވިއެވެ.

"ކެރެން ވާނެ މަގުމަތީގައި އުޅެން. މަގާމުތައް ލިބުނީމައެއް ނޫން ބޮޑެތި ބަސްތައް ބުނަން ވާނީ. އެ މީހާގެ އެތެރޭގައި ހުރި ކަމެއް ދައްކަން ވާނީ އޭގެ ކުރިން،" ޔާމީން ވިދާޅުވިއެވެ.

ޔާމީން އެހެން ވިދާޅުވިއިރު އިންތިހާބީ ރައީސް ޑރ. މުހައްމަދު މުއިއްޒު ވަނީ ޔާމީން ރީތި ގޮތުގައި މިނިވަން ކުރުމުގެ ފުރުސަތު އެ މަނިކުފާނަށް ދެއްވައި، މަގުމަތީ ހަރަކާތްތަކާއި އެއްވުންތައް ނުބޭއްވުމަށް ސަޕޯޓަރުންނަށް އިލްތިމާސް ކުރައްވާފައެވެ. ނަމަވެސް، އެހެން ވިދާޅުވި ރޭ ވެސް ސަޕޯޓަރުން ޔާމީންގެ ގޭދޮށަށް އެއްވެ އަޑުއުފުލާފައެވެ.