ވެރިކަމުގެ ނިޒާމު ބަދަލުކުރުމުގެ ވޯޓަކަށް ގޮސްފިނަމަ، ރިޔާސީ ނިޒާމު ބޭއްވުމަށް، ޢަމަލީގޮތުން މަސައްކަތް ކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ވެރިކަމުގެ ނިޒާމު ބަދަލުކުރުމަށް ޢާންމުންގެ ޚިޔާލު ހޯދުމުގެ ވޯޓެއް ނަގަން ރައްޔިތުންގެ މަޖިލީހުން ފާސްކުރި ޤަރާރާއި ގުޅިގެން އެމްޑީޕީން ގޮތެއް ނިންމުމަށް ބޭއްވި އެޕާޓީގެ ޤައުމީ މަޖިލީހުގެ ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ، އެމަނިކުފާނު ތާއީދު ކުރައްވަނީ ރިޔާސީ ނިޒާމަކަށް ކަމަށާއި، ރާއްޖެއަށް އެންމެ ފައިދާހުރި ނިޒާމަކީވެސް ރިޔާސީ ނިޒާމުކަމަށެވެ. 

"ދެ ނިޒާމުގައި ވެސް ރަނގަޅާއި، ގޯސް އެބަހުރި. އެކަމަކު މިރާއްޖެއަށް އެންމެ ރަނގަޅީ ރިޔާސީ ނިޒާމުކަމަށް އަޅުގަނޑު ދެކެނީ. އަޅުގަނޑުގެ ތާއީދު އޮތީ ރިޔާސީ ނިޒާމަށް." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.

ޤައުމީ މަޖިލީހުގައި ވާހަކަފުޅު ދައްކަވަމުން ރައީސް ވިދާޅުވީ، ނިމިދިޔަ ރިޔާސީ އިންތިޚާބުގައި ރައްޔިތުން ގޮތް ނިންމައިފިކަމަށާއި، ދެން އޮތީ ޒިންމާދާރުކަމާއެކު އިދިކޮޅު ޕާޓީއެއްގައި އޮވެގެން ސަރުކާރު ޖަވާބުދާރީ ކުރުވުންކަމަށެވެ. އެމަނިކުފާނުގެ ޢަމާޒަކީ އަންނަ އަހަރު އޮންނަ ރައްޔިތުންގެ މަޖިލީހުގެ އިންތިހާބުގެ އަޣްލަބިއްޔަތު އެމްޑީޕީއަށް ހޯދައިދީ، 2028 ވަނަ އަހަރު އޮންނަ ރިޔާސީ އިންތިހާބު އެޕާޓީއަށް ކާމިޔާބުކޮށްދިނުންކަމަށްވެސް ރައީސް ޞާލިޙް ވިދާޅުވިއެވެ. އެކަމަށް އެޕާޓީއަށް އެއްބާރުލުމާއި އެހީތެރިކަން ދެއްވާނެކަމަށް ރައީސް ވިދާޅުވިއެވެ.

ރައީސްގެ ވާހަކަފުޅުގައި، ކޮންމެ ކަމެއްގައިވެސް ކާމިޔާބީއާއެކު ނާކާމިޔާބީއާވެސް ކުރިމަތިލާންޖެހޭކަން ފާހަގަކުރައްވާ ވިދާޅުވީ ނާކާމިޔާބިއަކީ އެޕާޓީއަށް އައު ކަމެއް ނޫންކަމަށެވެ. ޑިމޮކްރަސީގައި އިދިކޮޅުގެ ދައުރަކީވެސް މުހިންމު ދައުރެއްކަމަށާއި، އެއީ ވެރިކަން ހިންގުމުގެ އެއް ބާރުކަމަށް ރައީސް ވިދާޅުވިއެވެ.

އިންތިހާބުން ނާކާމިޔާބު ވުމަށްފަހު ފުރަތަމަ ބޭއްވި ނޫސްވެރިންގެ ބައްދަލުވުމުގައިވެސް ރައީސް ވިދާޅުވެފައިވަނީ އެމަނިކުފާނު މިހާރު ކުރައްވަމުން ގެންދަވާ މަސައްކަތަކީ އެމްޑީޕީ ވަރުގަދަ ކުރުމުގެ މަސައްކަތް ކަމަށެވެ.