ރާއްޖޭގެ ވެރިކަމުގެ ނިޒާމު، ބަރުލަމާނީ ނިޒާމަކަށް ބަދަލުކުރަން ނުފެންނަކަމަށް އެމްޑީޕީއާއި އަދާލަތު ޕާޓީންވެސް ނިންމައިފިއެވެ. 

ވެރިކަމުގެ ނިޒާމު ބަދަލުކުރަން ޢާންމުންގެ ވޯޓެއް ނަގަން ރައްޔިތުންގެ މަޖިލީހުން ފާސްކުރެއްވި ޤަރާރާ ގުޅިގެން، އެމްޑީޕީން ގޮތެއް ނިންމުމަށް ރޭ ބޭއްވި ޤައުމީ މަޖިލީހުގެ ބައްދަލުވުމުގައި ބައިވެރިވެވަޑައިގެންނެވި ހުރިހާ މެންބަރުންގެ ރޫހުވެސް ހުރީ ރިޔާސީ ނިޒާމު ދަމަހައްޓައި، ބަރުލަމާނީ ނިޒާމަށް ނޫނެކޭ ބުނުމަށެވެ.

ޤައުމީ މަޖިލީހުގައި ވާހަކަފުޅު ދެއްކެވި މެންބަރުން ވަނީ ބަރުލަމާނީ ނިޒާމެއް ގެނައުމަށް ރައީސް މުޙައްމަދު ނަޝީދު ކުރައްވާ މަސައްކަތަށް ފާޅުގައި ދެކޮޅު ހައްދަވާނެކަމަށް ވިދާޅުވެފައެވެ. އަދި މިހާރު ތިއްބެވީ "ނަޝީދު ނޫންގޮތެއް"ގައިކަމަށްވެސް އެ މެންބަރުން ވިދާޅުވަމުން ގެންދެވިއެވެ.

ވެރިކަމުގެ ނިޒާމު ބަދަލުކުރަން ޢާންމުންގެ ވޯޓެއް ނަގަން ރައްޔިތުންގެ މަޖިލީހުން ފާސްކުރެއްވި ޤަރާރާ ގުޅިގެން، އަދަލާތު ޕާޓީން ގޮތެއް ނިންމުމަށް ރޭ ބޭއްވި އެޕާޓީގެ މަޝްވަރާ މަޖިލީހުގެ އިއްތިފާގުންވެސް ވަނީ ރާއްޖޭގައި ފެންނަން އޮންނަ ނިޒާމަކީ ރިޔާސީ ނިޒާމު ކަމަށް ފާސް ކުރައްވާފައެވެ. ރާއްޖޭގެ ވެރިކަމުގެ ނިޒާމު ބަރުލަމާނީއަށް ބަދަލުކުރުމަށް އެންމެ ބޮޑަށް ވަކާލާތު ކުރައްވަނީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދެވެ.

އެމްޑީޕީގެ ޤައުމީ މަޖިލީހުގައި އަބްދުﷲ ޝާހިދު ވާހަކަފުޅު ދައްކަވަނީ

ނިޒާމު ބަދަލުކުރުމަށް ރައްޔިތުންގެ ފެންނަ ނުފެންނަ ވޯޓަކަށް ދިއުމަށް ގޮވާލާ މަޖިލީހަށް ޤަރާރެއް ހުށައެޅީ ދަ ޑިމޮކްރެޓްސްގެ ފަރާތުންނެވެ. އެ ގަރާރު ފާސްކުރީ މިމަހުގެ 20 ވަނަ ދުވަހުއެވެ. ނަމަވެސް ޤަރާރާއި ގުޅިގެން ކުރަންޖެހޭ ގިނަ މަސައްކަތްތަކެއް ހުރުމުން މިހާރު އޮތް މުއްދަތުގައި އެވޯޓު ނުގެން ނެތްކަމަށް އިލެކްޝަންސް ކޮމިޝަނުންވެސް ވަނީ މަޖިލީހަށް އަންގާފައެވެ.

ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަށް ބަދަލު ކުރުމަށް ރާއްޖޭގެ ސިޔާސީ ޕާޓީތަކުގެ ތެރެއިން ޑިމޮކްރެޓްސްގެ މެމްބަރުން ފިޔަވައި އެހެން އެއްވެސް ސިޔާސީ ޕާޓީއަކުންވެސް ބަރުލަމާނީ ނިޒާމަށް ތާއީދު ނުކުރައްވައެވެ.