ރިޔާސީ އިންތިޚާބުގެ ދެވަނަ ބުރުގައި ބާތިލް ވޯޓުގެ އަދަދު ފުރަތަމަ ބުރަށްވުރެ އިތުރުވުމުގެ ސަބަބުން އެކަމުގެ ކަންބޮޑުވުން އިލެކްޝަންސް ކޮމިޝަނުން ހާމަކޮށްފިއެވެ.

ރިޔާސީ އިންތިޚާބުގެ ފުރަތަމަ ބުރުގައި ބާތިލް ވޯޓުގެ ގޮތުގައި 4835 ބާތިލް ވޯޓު ލާފައިވެއެވެ. ދެވަނަބުރުގައި އެއަދަދު ވަނީ ބޮޑު ތަނުން އިތުރުވެފައެވެ. ދެވަނަ ބުރުގައި ބާތިލް ވޯޓުގެ ގޮތުގައި 7888 ވޯޓު ލާފައިވެއެވެ.

މިހާ ގިނަ ޢަދަދެއްގެ ވޯޓު ބާތިލްވުމުން ޢާންމު ރައްޔިތުންގެ ހުރި ކަންބޮޑުވުންތަކަށް ހައްލު ހޯދުމަށް އިލެކްޝަންސް ކޮމިޝަނުން މަސައްކަތް ކުރާނެކަމަށް ކޮމިޝަނުން ވަނީ ވިދާޅުވެފައެވެ.

ފުރަތަމަ ބުރަށްވުރެ ދެވަނަ ބުރުގައި ބާތިލް ވޯޓު ގިނަވުމަކީ، ކޮމިޝަނުގެ ވަރަށް ބޮޑު ކަންބޮޑުވުމެއް ކަމަށް އީސީން ވަނީ ބުނެފައެވެ.

މިކަންބޮޑުވުންތަކަށް ހައްލު ހޯދުމަށް ކޮމިޝަންގައި މަޝްވަރާކޮށް މިކަމަށް ހައްލު ހޯދޭނެ ގޮތްތަކެއް ބަލައި ކުރިއަށް އޮތް މަޖިލިސް އިންތިޚާބަށް ކޮމިޝަނުން ހައްލު ތަކެއް ހޯދާނެކަމަށް އީސީން ވަނީ ވިދާޅުވެފައެވެ. ރިޔާސީ އިންތިޚާބުގެ ފުރަތަމަ ބުރަށްވުރެ ދެވަނަބުރުގައި އެކާވީސް ހާހަށްވުރެ ގިނަ މީހުން ވޯޓުލާފައިވާއިރު، ވޯޓުލީ މީހުންގެ އިންސައްތަވެސް %87 އަށްވުރެ މައްޗެވެ.

އިލެކްޝަންސް ކޮމިޝަންގެ ޓީމަކީ ގޮންޖެހުންތަކާއެކުވެސް، ނަޒާޙަތްތެރިކަން އިސްކޮށް، ތެދުވެރިކަމާއި އަމާނާތްތެރިކަމާއެކު ވާޖިބު އަދާކުރުމުގައި އެފަދަ ދެވަނައެއްނެތް ހުނަރުވެރި ޤާބިލް ޓީމެއްކަމަށް އެ ކޮމިޝަނުން ވަނީ ވިދާޅުވެފައެވެ. ރިޔާސީ އިންތިޚާބު 2023 ގެ ދެވަނަ ބުރުގެ ވަގުތީ ނަތީޖާ، އިލެކްޝަންސް ކޮމިޝަނުން ރޭ ވަނީ، ޢާންމު ކުރައްވާފައެވެ. އަދި މިއަދު ވަގުތީ ނަތީޖާގެ ޖުމްލަ ނަތީޖާވެސް، އިޢުލާން ކުރެވިގެންދާނެއެވެ.