ރިޔާސީ އިންތިހާބުގެ ދެވަނަ ބުރަށް ބޭނުންވާ ވޯޓު ކަރުދާހާއި އެހެނިހެން ތަކެތި އަތޮޅުތަކަށް ފޮނުވުމުގެ މަަސައްކަތް އިލެކްޝަންސް ކޮމިޝަން (އީސީ) އިން ފަށައިފި އެވެ. އެ ކޮމިޝަނުން ކުރި ޓްވީޓެއްގައި ބުނެފައިވަނީ ރިޔާސީ އިންތިހާބުގެ ދެވަނަ ބުރުގެ ވޯޓުލާ މަރުކަޒުތަކަށް ބޭނުންވާ ތަކެތި އަތޮޅުތަކަށް ފޮނުވުމުގެ މަސައްކަތް މިއަދު ފަށާފައިވާކަމަށެވެ.

ރިޔާސީ އިންތިހާބުގެ 2 ވަނަ ބުރުގައި 282،804 މީހުންނަށް ވޯޓު ލުމުގެ ހައްޤު ލިބެއެވެ. އޭގެ ތެރޭގައި އަލަށް 409 މީހަކަށް ވޯތުލެވެއެވެ.

ރިޔާސީ އިންތިހާބުގެ ދެވަނަ ބުރަށް 285،631 ވޯޓު ކަރުދާސް ޗާޕުކޮށްފައިވާކަމަށް އިސީން މައުލޫމާތުދެ އެވެ. އިންތިހާބުގެ ފުރަތަމަ ބުރަށް ޗާޕުކުރީ ޖުމްލަ 285،219 ވޯޓު ކަރުދާހެވެ. ފުރަތަމަ ބުރުގައި ވޯޓުލުމުގެ ހައްގު ލިބުނީ 282،395 މީހުންނަށެވެ.

ރީ-ރަޖިސްޓްރޭޝަނަށް ފަހު 2 ވަނަ ބުރުގައި ވޯޓުފޮށީގެ އަދަދަށްވެސް ވަނީ ބަދަލުތަކެއް އައިސްފައެވެ. ފުރަތަމަ ބުރުގައި ބަހައްޓާފައިވަނީ 574 ވޯޓުފޮއްޓެކެވެ. ނަމަވެސް މިހާރު މިއަދަދު 586 އަށް ވަނީ އިތުރުވެފައެވެ. މިއީ 12 ފޮށީގެ އިތުރުވުމެކެވެ. އިތުރަށް ވޯޓުފޮށި ބަހައްޓަނީ މާލޭގައި 4 ފޮށި، ހުޅުމާލެ ފޭސް 1 ގައި 2 ފޮށި، ހުޅުމާލެ ފޭސް 2 ގައި 4 ފޮށި، ވިލިމާލޭގައި 1 ފޮށި އަދި އިންޑިއާގެ ޓްރިވެންޑްރަމްގައި 1 ފޮށްޓެވެ.  

ވޯޓުލުމުގެ ކަންކަން އަވަސްކަމާއެކު ކުރިއަށްގެންދިއުމަށް 500 އަށްވުރެ ގިނަ މީހުން ވޯޓުލާން ރަޖިސްޓްރީކޮށްފައިވާ ފޮށިތަކުގައި 2 ސެޓަޕަށް ވޯޓުލުމުގެ ކަންކަން މިފަހަރު ކުރިއަށްދާނެކަމަށް އީސީން ބުނެއެވެ. އެގޮތުން ވޯޓުލާ 99 މަރުކަޒެއް މިގޮތަށް ބަދަލުގެނެސްފައިވާކަމަށް ހަބީބް ވިދާޅުވިއެވެ.