ރިޔާސީ އިންތިޚާބުގެ ދެވަނަ ބުރުގައި ވޯޓުލެވޭ މީހުންގެ ލިސްޓު ފައިނަލްކޮށް ގެޒެޓްކޮށްފިއެވެ. ލިސްޓު ފައިނަލް ކޮށްފައިވަނީ ރީރަޖިސްޓްރޭޝަން މަރުހަލާ ނިންމުމަށްފަހުގައެވެ.

އިލެކްޝަންސް ކޮމިޝަނުން ޢާންމު ކުރައްވާފައިވާ ވޯޓާސް ލިސްޓުގައި، ރިޔާސީ އިންތިހާބުގެ ދެވަނަ ބުރުގައި ވޯޓުލުމުގެ ހައްގު 282،804 މީހަކަށް ލިބިގެންވެއެވެ. އިންތިހާބުގެ ފުރަތަމަ ބުރުގައި ވޯޓުލުމުގެ ހައްގު ލިބުނީ 282،395 މީހަކަށެވެ. އެހެންކަމުން ދެވަނަ ބުރުގައި އިތުރަށް ވޯޓުލުމުގެ ހައްޤު ލިބިފައިވަނީ 409 މީހަކަށެވެ.

އިލެކްޝަންސް ކޮމިޝަނުން ވިދާޅުވީ، ރީ-ރަޖިސްޓްރީ ކުރުމަށް ހުށަހެޅި ފޯމުތަކުގެ ސައްޙަކަން ކަށަވަރުކޮށް، ޑަބަލް ޗެކް ކުރުމުގެ މަސައްކަތް މިހާރު ނިމި ލިސްޓް ފައިނަލްވެފައިވާކަމަށެވެ. ލިސްޓު ފައިނަލް ކުރުމަށްފަހު މިއަދު ކުރިއަށްދަނީ ލިސްޓުގައި އިލެކްޝަންސްގެ ވެރިން ސޮއިކުރުމުގެ މަސައްކަތްކަމަށާއި، މާދަމާ ކެނޑިޑޭޓުންގެ ފަރާތުން ލިސްޓުގައި ސޮއިކުރާނެކަމަށް އީސީން ވިދާޅުވިއެވެ.

ރިޔާސީ އިންތިހާބުގެ ދެވަނަ ބުރުގެ ވޯޓުލުން އޮންނާނީ އަންނަ ހޮނިހިރު ދުވަހުއެވެ. ރާއްޖޭގައި ވޯޓުލުން ކުރިއަށްދަނީ ހެނދުނު 8 އިން ހަވީރު 5 ޖެހުމާއި ހަމައަށެވެ.  

މިއަހަރުގެ ރިޔާސީ އިންތިހާބުގައިވެސް ރާއްޖެއިން ބޭރުގެ 5 ތަނެއްގައި ވޯޓު ފޮށި ވަނީ ބަހައްޓާފައެވެ. މިގޮތުން އަބޫދާބީއާއި، އިންޑިއާގެ ޓްރެވެންޑްރަމާއި، ސްރީލަންކާގެ ކޮލޮމްބޯއާއި، އިނގިރޭސިވިލާތުގެ ލަންޑަނާއި، މެލޭޝިއާގެ ކުއަލަލަންޕޫރުގައި ވޯޓު ފޮށި ބަހައްޓާގޮތަށް ވަނީ ހަމަޖެހިފައެވެ.

މި ގައުމުތަކުގައި ވޯޓުލުން ކުރިއަށްދާނީ އެ ޤައުމެއްގެ ގަޑިއަށް ބަލާފައެވެ. އެގޮތުން އަބޫދާބީގައި ހެނދުނު 8 ޖަހާއިރު ވޯޓު ލާން ފަށާގޮތަށްވަނީ ހަމަޖައްސާފައެވެ. އަދި އިންޑިއާގެ ޓްރެވެންޑްރަމާއި ސްރީލަންކާގެ ކޮލޮމްބޯއާއި އިނގިރޭސިވިލާތުގެ ލަންޑަންގައި ވޯޓުލާން ފެށުމަށް ހަމަޖެހިފައިވަނީ ހެނދުނު 08:30 ގައެވެ. މެލޭޝިއާގެ ކުއަލަލަންޕޫރުގައި ވޯޓުލާން ފެށުމަށް ހަމަޖެހިފައިވަނީ 11:00 ގައެވެ.

އަބޫދާބީގައި ވޯޓު ފޮށި ބަންދުކުރުމަށް ހަމަޖެހިފައިވަނީ އެ ޤައުމުގެ ގަޑިން ހަވީރު 5 ޖަހާއިރުގައެވެ. އިންޑިއާގެ ޓްރެވެންޑްރަމާއި ސްރީލަންކާގެ ކޮލޮމްބޯއާއި އިނގިރޭސިވިލާތުގެ ލަންޑަންގައި ވޯޓު ފޮށިތައް ބަންދުކުރުމަށް ހަމަޖެހިފައިވަނީ ހަވީރު 5:30 ގައެވެ. މެލޭޝިއާގެ ކުއަލަލަންޕޫރުގައި ވޯޓު ފޮށި ބަންދުކުރުމަށް ހަމަޖެހިފައިވަނީ އެ ޤައުމުގެ ގަޑިން ރޭގަނޑު 8 ޖަހާއިރުކަމަށް އީސީއިން ވިދާޅުވެއެވެ.