ސިއްހީ ދާއިރާއަށް ބޭނުންވާ އިތުރު 20 އެމްބިއުލާންސް ފޯރުކޮށްދިނުމަށް މިނިސްޓްރީ އޮފް ހެލްތް އާއިއެކު އެސްޓީއޯއިން އެއްބަސްވުމެއްގައި ސޮއިކޮށްފިއެވެ. 

އާދީއްތަ ދުވަހު ބޭއްވި މި ރަސްމިއްޔާތުގައި ހެލްތު މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރ އޮފް ސްޓޭޓް ފޮރ ހެލްތު, އަލްފާޟިލް އަހުމަދު އާދިލްއެވެ. އަދި އެސްޓީއޯގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިންގ ޑިރެކްޓަރ އަލްފާޟިލް އަބްދުﷲ ސައީދު އެވެ.

މި އެއްބަސްވުމުގައި ވާގޮތުން 90 ދުވަހުގެ ތެރޭގައި މި އެމްބިއުލާންސްތައް ރާއްޖެ ގެނަސް، މިނިސްޓްރީ އާއި ހަވާލު ކުރަންޖެހެއެވެ.

މިކަމަށްޓަކައި ބޭއްވި ޙާއްސަ ރަސްމިއްޔާތުގައި ވާހަކަފުޅު ދައްކަވަމުން, މިނިސްޓަރ އޮފް ހެލްތް އޮނަރަބަލް އަޙުމަދު ނަސީމްވަނީ އެސްޓީއޯއިން ދިވެހި ރާއްޖޭގެ ސިއްޙީ ދާއިރާގެ ކުރިއެރުމަށް ކުރައްވަމުން ގެންދަވާ މަސައްކަތް ފާހަގަ ކުރައްވާ އެކަމަށް ތައުރީފު ކުރައްވާފައެވެ. އަދި ޙާއްސަ ގޮތެއްގައި މި ދާއިރާއިން އިންސާނީ ވަސީލަތް ތަރައްގީ ކުރެއްވުމަށް ކުރައްވަމުން ގެންދަވާ ބުރަ މަސައްކަތަށް އަލިއަޅުވާ ލެއްވެވިއެވެ.

އެސްޓިއޯ އިން މީގެ ކުރިންވެސް ވަނީ ހެލްތް މިނިސްޓްރީގެ އެދިލެއްވުމަށް، ސިއްހީ ދާއިރާއަށް ބޭނުންވާ 96 އެމްބިއުލާންސް ފޯރުކޮށްދީފައެވެ. އަދި އެސްޓީއޯއިން ހާމަ ކުރައްވާފައިވާ ގޮތުގައި, މިފަހަރު ވެވުނު އެއްބަސްވުމުގެ ދަށުން ގެނެވޭ 20 އެމްބިއުލޭންސް ގެންނާނީ ޖަޕާނުންނެވެ.