ބުރާސްފަތި ދުވަހުގެރޭ ވެރިކަން ކުރާ އެމްޑީޕީއިން ބޭއްވި ކެމްޕޭން ޖަލްސާގައި ރައީސުލް ޖުމްހޫރިއްޔާ އިބްރާޙިމް މުޙައްމަދު ޞާލިޙް ވަނީ، ދޮށީ އުމުރުގެ އެލަވަންސާއި އަދި ވަޒީފާއިން ރިޓަޔާކުރާ އުމުރާ ގުޅޭ އުއްމީދީ ނިންމެވުންތަކެއް ނިންމެވިކަން އިޢުލާން ކުރައްވާފައެވެ.

އެގޮތުން، އެ މަނިކުފާނު ވަނީ ދޮށީ އުމުރުގެ މީހުންނަށް ދައުލަތުން ދެމުން އަންނަ އަސާސީ ޕެންޝަން 5،000ރ. އިން 7،000ރ. އަށް ބޮޑުކުރައްވާފައެވެ. ރައީސް ޞާލިހް ވިދާޅުވީ މިހާރު އުމުރުން ދުވަސްވީ މީހުންނަށްދޭ 5،000 ރުފިޔާއަކީ މީގެ އަހަރުތަކެއް ކުރިން ކަނޑައަޅާފައިވާ އަދަދެއް ކަމަށާއި އެ ފައިސާއިން ދިރިއުޅުމުގެ ހަރަދުތައް ދެކޮޅުނުޖެހޭކަން ރައްޔިތުން ފާހަގަކުރާކަމަށާއި، އެ އަދަދަށް ބަދަލު ގެންނެވީ އެ ސަބަބަށްޓަކައި ކަމަށެވެ.

ރައީސް ޞާލިޙް ދެން ނިންމެވިކަމަކީ، ވަޒީފާއިން ރިޓަޔާކުރާ އުމުރު ބަދަލުކުރުމެވެ. އެގޮތުން، މިހާރު 65 އަހަރުން ރިޓަޔަކުރަންޖެހޭ އިރު، ދެން އެމީހަކު ބޭނުންނަމަ 70 އަހަރާއި ހަމައަށް ރިޓަޔަނުކޮށް މަސައްކަތް ކުރެވޭނެއެވެ. މި ސިޔާސަތާއެކު، އުމުރުން 65 އަހަރުވުމަށްފަހު ރިޓަޔާ ކުރާނީ އެމީހަކު ބޭނުން ނަމަ އެވެ.

ނަމަވެސް މި ސިޔާސަތާއެކީ އަސާސީ ޕެންޝަން ލިބެން ފަށާ އުމުރަށް އެއްވެސް ބަދަލެއް ނާންނާނެއެވެ. އަސާސީ ޕެންޝަން ލިބެން ފަށާ  އުމުރަކީ އަދިވެސް 65 އަހަރުކަން، ރައީސް އޮފީހުގެ ތަރުޖަމާން، މިއުވާން މުޙައްމަދު ވަނީ ކަށަވަރުކޮށްދެއްވާފައެވެ. އެހެންކަމުން، ވަޒީފާގައި ދެމި ހުއްޓަސް، އަދި ރިޓަޔަރ ކުރެއްވި ނަމަވެސް، 65 އަހަރުން ފެށިގެން އަސާސީ ޕެންޝަން ލިބޭނެއެވެ.