މިދިޔަ ހުކުރު ދުވަހުގެ ރޭ "މަވެސް ޕީޕީއެމް" ގެ ނަމުގައި ކާނިވާ ސަރަޙައްދުގައި ބޭއްވި ކެމްޕެއިން ހަރަކާތުގައި ވާހަކަފުޅު ދައްކަވަމުން ޕީއެންސީ ގެ ރިޔާސީ ކެނޑިޑޭޓް، ޑރ. މުޙައްމަދު މުއިއްޒު ވަނީ ފުލުހުންނާއި ސިފައިންގެ މުސާރަ ޑަބަލް ކޮށްދެއްވާނެކަމަށް ވިދާޅުވެފައެވެ. ނަމަވެސް ރާއްޖޭގެ އިޤްތިޞާދު ފުނޑުފުނޑުވެފައިވާކަމަށް އެބޭފުޅުންގެ ކެމްޕެއިން ޖަލްސާތަކުގައި ވިދާޅުވަމުން ގެންދަވާއިރު، މި ވަޢުދަކީ ފުއްދޭނެ ވަޢުދެއްތޯ ގިނަ ބަޔަކު ދިޔައީ ސުވާލު ކުރަމުންނެވެ. 

އެގޮތުން "އާސްކް މުއިއްޒު" ގެ ނަމުގައި ސަންގު ޓީވީއިން އަންގާރަ ދުވަހުގެރޭ ބޭއްވި ޕްރޮގްރާމެއްގައި، އާންމު ފަރާތަކުން ވަނީ އެ ސުވާލު ޑރ. މުއިއްޒުއާއި ކުރައްވާފައެވެ. ޖަވާބުގައި ޑރ. މުއިއްޒު ވިދާޅުވެފައިވަނީ، އެކަން ކުރައްވަން ވިސްނަވަނީ އެއް ފަހަރާ ނޫންކަމަށާއި، ނަމަވެސް 3 ބުރަކަށް ބަހާލައިގެން ކަމަށެވެ. އެގޮތުން ފުރަތަމަ 2024 ގައި %35، އޭގެ 2 އަހަރު ފަހުން 2026 ގައި %35 އަދި 2028 ގައި ބާކީ %30 ކަމަށެވެ. 

ފުލުހުންނާއި ސިފައިންގެ މުސާރައިގެ ވަޢުދު ތަންފީޒު ކުރުމަށް ހުރި ގޮންޖެހުންތައް ފާހަގަ ކުރައްވަމުން ޑރ. މުއިއްޒު ވިދާޅުވެފައިވަނީ، އެބޭފުޅާގެ ވަޢުދުތަކަކީ ޓެކްނިކަލް ޓީމަކުން ނިންމައިގެން ރައްޔިތުންނަށް ހުށަހަޅާ ކަންތައްތަކެއް ކަމަށާއި، ނަމަވެސް ސިފައިންނާއި ފުލުހުންގެ މުސާރައާއި ގުޅިގެން ވެވުނު ވަޢުދަކީ ވެދާނެކަމެއްކަމަށް ޤަބޫލު ނުކުރާކަމަށެވެ.

ކެމްޕެއިން ޖަލްސާއެއްގައި ބޮޑު ވަޢުދެއްވުމަށްފަހު، އެ ވަޢުދާއި ގުޅިގެން ރައްޔިތުން ސުވާލު އުފެއްދުމުން އޭގެ 3 ދުވަސް ފަހުން ވާހަކަފުޅު ކުރިޔަށް ގެންދަވަމުން ޑރ. މުއިއްޒު އިތުރަށް ފާހަގަ ކުރެއްވީ، ރައްޔިތުންނަށް ކަމެއް ހުށަހަޅާއިރު ހުށަހަޅަނީ އެކަމެއް ކުރެވޭނެކަމުގެ ޔަޤީންކަން އޮވެގެންކަމަށެވެ. ނަމަވެސް ޓީވީ ޕްރޮގްރާމުގައި ޑރ. މުއިއްޒު ދެއްކެވި ވާހަކަފުޅުން ފާހަގަވެފައިވަނީ ފުލުހުންނާއި ސިފައިންގެ މުސާރަ ޑަބަލްކުރުމުގެ ވަޢުދަކީ އެހާބޮޑަށް ރޭވިގެން ވެވުނު ވަޢުދެއް ނޫންކަމެވެ. 

އަދި މީގެ އިތުރުން ތަންފީޒީ އެހެން އިދާރާތަކާއި، މިނިވަން މުވައްސަސާތަކާއި ސަރުކާރުގެ އެހެން މުވައްޒަފުންގެ މުސާރައަށް ވެސް ހެޔޮ ބަދަލުތަކެއް ގެނެސްދިނުމުގެ ވިސްނުންފުޅު ގެންގުޅޭކަމަށާއި، ނަމަވެސް މި ހުރިހާކަމެއް ކުރެވޭނީ ރާއްޖޭގެ އިޤްތިޞާދު ރަނގަޅުވެ، ޤައުމުގެ އާމްދަނީ އިތުރު ކުރެވޭ މިންވަރަކަށް ބަލައިގެންކަމަށް ވަނީ ވިދާޅުވެފައެވެ.

ޑރ. މުއިއްޒު މިހެން ވިދާޅުވެފައިވާއިރު، ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވަނީ ޕޭ ހާމަނައިޒޭޝަންގެ ދަށުން، ފުލުހުންނާއި ސިފައިން، ޝަރުއީ ދާއިރާގެ ހުރިހާ މުވައްޒަފުން، މޯލްޑިވްސް އިމިގްރޭޝަނާއި ކަސްޓަމްސް ސާވިސް، ކަރެކްޝަނަލް ސާވިސް، ސިވިލް ސާވިސްގައި ހިމެނޭ އެހެން ހުރިހާ މުވައްޒަފުންގެ އިތުރުން އިމާމުންނާއި މުދިމުންގެ މުސާރަ ވެސް މިއަންނަ ޖެނުއަރީ މަހުން ފެށިގެން އެންމެ މަދުވެގެން %40 ގެ ކުރިއެރުމެއް ގެންނަވާނެކަމަށް ވިދާޅުވެފައެވެ.

ފުލުހުންނާއި ސިފައިންނަށް މިހިނގާ 2023 ވަނަ އަހަރު ކަނޑައަޅާފައިވާ ބަޖެޓަށް ބަލާލާއިރު، އެލަވަންސްތަކާއި، ޕެންޝަނާއި އަދި މުސްކުޅި ކުރުމުގެ ފައިސާއާ ނުލައި ފުލުހުންގެ މުސާރައަށް 510.9 މިލިއަން ރުފިޔާ ޚަރަދުވެއެވެ. އަދި ސިފައިންގެ މުސާރައަށް 370.2 މިލިއަން ރުފިޔާ ޚަރަދުވެއެވެ. އެހެންކަމުން މިހާރު އޮތް ކެޕޭސިޓީގައި އެ ދެ މުވައްސަސާގެ މުސާރަ ޑަބަލް ކުރާނަމަ 1.76 ބިލިއަން ރުދިޔާ ޚަރަދުވާނެއެވެ.