ރިޔާސީ އިންތިޚާބުގެ ކެމްޕޭނުގައި، ހިޔާ ސަރަހައްދަށް ޑޯޓުޑޯއަށް ވަޑައިގެންނެވުމުން ރައީސުލްޖުމްހޫރިއްޔާގެ އަނބިކަނބަލުން، މެޑަމް ފަޒްނާ އަޙްމަދަށް ހަމަލާދިނުމަށް އިދިކޮޅު ކެންޑިޑޭޓުގެ ސަޕޯޓަރުން މަސައްކަތްކޮށްފިއެވެ.

މަންޒަރުދުށް ބައެއް މީހުން ބުނެފައިވާ ގޮތުގައި، މެޑަމް ފަޒްނާ ހިޔާ ސަރަހައްދަށް ވަޑައިގެން އުޅުއްވަނިކޮށް އިދިކޮޅު ކެންޑިޑޭޓުގެ ސަޕޯޓަރުންތަކެއް ވަނީ އެކަމަނާއާ ދިމާކޮށްލައި، އެކަމަނާގެ ފަހަތުން ހިނގައި އަދި އެކަމަނާގެ ހަށިކޮޅަށް އަމާޒުކޮށް ބައެއް އެއްޗެހިވެސް އުކާފައެވެ.

އެސަރަހައްދުގައި ހަމަނުޖެހުން ހިންގަން އުޅުނު މީހަކު ވަނީ އެވަގުތު ފުލުހުންގެ ބެލުމުގެ ދަށަށްވެސް ގެންގޮސްފައެވެ.

މިހާދިސާ ހިނގައި ދިޔަގޮތް މެޑަމް ފަޒްނާ ވަނީ އެކަމާގެ ފޭސްބުކް ގައި ލިޔުއްވާފައެވެ.

މެޑަމް ފަޒްނާ ހިޔާ ސަރަހައްދަށް ވަޑައިގެން އުޅުއްވަނިކޮށް، ޑރ. މުއިއްޒަށް ތާއީދު ކުރާ ފަރާތްތަކުން ނުކުމެ އެކަމަނާއާ ދިމާކޮށްލައި ހިންގި ދަށުދަރަޖައިގެ އަމަލު ވަރަށް ގިނަ އާންމު ރައްޔިތުން ވަނީ ކުށްވެރިކޮށްފައެވެ. 

މެޑަމް ފަޒްނާއަށް ހުރަސްއަޅައި، އިދިކޮޅު ކެންޑިޑޭޓުގެ ސަޕޯޓަރުން ހިންގި އަމަލު، އެމްޑީޕީގެ އިސްބޭފުޅުންގެ އިތުރުން އެހެން ސިޔާސީ ޕާޓީތަކުގެ އިސްބޭފުޅުންވެސް ވަނީ ކުށްވެރިކުރައްވާފައެވެ.

އެކަމާއި ގުޅޭ ގޮތުން ޔޫތު މިނިސްޓަރ މަޚުލޫފް ވިދާޅުވީ، ހިޔާ ފްލެޓު ސަރަހައްދަކީ ވަކި ބައެއްގެ ބާރު ހިނގާ ސަރަހައްދެއް ނޫންކަމަށާއި، ފަސްޓް ލޭޑީ ފަޒްނާއަށް ހުރަސް އަޅާ އަދި ހަމަލާދޭން މަސައްކަތްކޮށް މިއަދު ހިންގީ ވަރަށް ފިނޑި އަމަލެއްކަމަށާއި އެކަމަނާގެ ހިއްވަރަށް ސާބަސް ދެއްވާ ކަމަށެވެ.

އަދި ޑިފެންސް މިނިސްޓަރ މާރިޔާ ވިދާޅުވީ، މިފެންނަނީ މުޢިއްޒަށް ވެރިކަން ލިބިއްޖެނަމަ ރާއްޖެ އޮންނާނެ ގޮތުގެ ތަޞައްވަރު ކަމަށެވެ. އެއީ އެސަރަހައްދަށް އެމްޑީޕީން ދިޔައިމާ ކަންކުރާ ގޮތްކަމުގައިވެސް މާރިޔާ ވިދާޅުވިއެވެ. އެކަމަނާ ވިދާޅުވީ، މިނިވަންކަމާއި އެކު ކެމްޕެއިން ކުރުން އެއީ އެމްޑީޕީން ވަރަށް ބުރަކޮށް މަސައްކަތްކޮށްގެން ހޯދި ހައްޤެއް ކަމަށެވެ.

ރިޔާސީ އިންތިޚާބުގެ ކެމްޕޭނުގައި މެޑަމް ފަޒްނާ ހިޔާ ސަރަހައްދަށް ވަޑައިގެންނެވުމުން އިދިކޮޅު ކެންޑިޑޭޓުގެ ސަޕޯޓަރުން އެކަމަނާއާ ދިމާކޮށްލި އިރު، އިދިކޮޅު ކެންޑިޑޭޓަށް ތާއީދުކުރާ، އެކްޓިވިސްޓުން ހިންގާ އޮންލައިން ނޫސްތަކުން ދަނީ، އެކަމަނާގެ ޒާތާއި ކަރާމަތާއި އަބުރަށް އަރައިގަނެ، ޒާތީގޮތުން އެކަމަނާއާ ދިމާކުރަމުންނެވެ. 

ރިޔާސީ އިންތިޚާބުގެ ދެވަނަ ބުރު ކާމިޔާބު ނުކުރެވޭނެކަމުގެ ބިރު ހިތުގައި އުފެދޭތީ އިދިކޮޅު ކެންޑިޑޭޓްގެ ސަޕޯޓަރުންނާއި އިދިކޮޅު ކެންޑިޑޭޓްވެސް އިސްވެ ހުންނަވައި ދަނީ ފިތުނަވެރިކަމާއި ދޮގުވާހަކަތައް ފަތުރުއްވަމުުންނެވެ.